Hoppa yfir valmynd
SérfræðistörfReykjavík202007/1232Háskóli Íslands

Verkefnastjóri Færniseturs Hjúkrunarfræðideildar

Verkefnastjóri Færniseturs Hjúkrunarfræðideildar 


Laust er til umsóknar 70% starf verkefnastjóra sem mun hafa umsjón með Færnisetri Hjúkrunarfræðideildar Háskóla Íslands (https://www.hi.is/heilbrigdisvisindasvid_hjukrunarfraedideild/faernisetur). Um þróunarverkefni er að ræða og til að byrja með verður ráðið í starfið til tveggja ára.

Starfið er 70% á ársgrundvelli, en vinnutíminn getur verið breytilegur og fer að hluta til eftir árstíðabundnu álagi í tengslum við kennslu í deildinni. Til greina kemur að viðkomandi sinni einnig kennslu og myndi þá starfshlutfall geta aukist í samræmi við það.

Markmið með ráðningunni er að þróa enn frekar starfsemi Færnisetursins, stuðla að framúrskarandi gæðum þess náms og kennslu sem þar fer fram, styðja við nemendur og kennara, ásamt því að framfylgja stefnu, reglum og markmiðum Færnisetursins.


Helstu verkefni og ábyrgð
Verkefnastjórinn sér um daglegt utanumhald Færnisetursins og heyrir undir deildarforseta en er jafnframt hluti af stoðþjónustuteymi Hjúkrunarfræðideildar, sem staðsett er í Eirbergi við Eiríksgötu 34. Verkefnastjórinn vinnur náið með kennurum og samstarfsfólki á sviði kennslu- og upplýsingatæknimála.

Helstu verkefni:
- Skipulag kennslu í Færnisetrinu í samráði við kennara
- Daglegur rekstur, innkaup, skipulag og upplýsingaveita bæði innan deildar og utan
- Samræming kennslu og kennsluhátta í Færnisetri í samræmi við stefnu deildar
- Stuðla að vönduðu skipulagi náms og kennslu í Færnisetrinu
- Stuðningur við innleiðingu nýrra kennsluhátta í færni- og hermikennslu í samvinnu við námsnefndir
- Kynnir sér og innleiðir nýjungar í færni- og hermikennslu
- Þjónusta, ráðgjöf og stuðningur við starfsfólk Hjúkrunarfræðideildar við notkun búnaðar í Færnistofu
- Kynning á starfsemi Færnisetursins, innan og utan Háskólans

Um er að ræða krefjandi starf í metnaðarfullu umhverfi og æskilegt að viðkomandi geti hafið störf sem fyrst.

Hæfnikröfur
Leitað er að einstaklingi sem hefur góða skipulags- og samskiptahæfileika, hefur gott vald á upplýsingatækni, er útsjónasamur og hefur ánægju af að leiðbeina öðrum. Viðkomandi þarf einnig að geta sett upp ferla og verklag sem styður við framangreind markmið og skilvirkan rekstur setursins.

Menntunar- og hæfniskröfur:
- BS próf í hjúkrunarfræði, MS próf telst kostur
- Mjög gott vald á upplýsingatækni og hæfni til að tileinka sér nýjungar á því sviði
- Reynsla af háskólakennslu telst kostur
- Góð samstarfshæfni, nákvæmni, útsjónarsemi og rík þjónustulund
- Færni í að miðla og kenna
- Sjálfstæð, skipulögð og lausnamiðuð vinnubrögð
- Góð íslensku- og enskukunnátta, bæði í ræðu og riti


Frekari upplýsingar um starfið
Laun samkvæmt gildandi kjarasamningi sem fjármála- og efnahagsráðherra og Félag háskólakennara hafa gert.
Eftirfarandi gögn skulu fylgja umsókninni:
i. Ferilskrá
ii. Staðfest afrit af prófskírteinum
iii. Meðmælabréf
iv. Greinargerð þar sem áhuga fyrir verkefninu er lýst og fjallað um hvað umsækjandi getur lagt af mörkum til þess.

Öllum umsóknum verður svarað og umsækjendum tilkynnt um ráðstöfun starfsins þegar ákvörðun hefur verið tekin. Umsóknir geta gilt í sex mánuði frá lokum umsóknarfrests. 

Við ráðningu í störf í Háskóla Íslands er tekið mið af jafnréttisáætlun skólans, sjá hér: http://www.hi.is/haskolinn/jafnrettisaaetlun#markmid2

Vakin er athygli á málstefnu Háskóla Íslands, sjá hér: https://www.hi.is/haskolinn/malstefna_haskola_islands.


Færnisetur Hjúkrunarfræðideildar er um 300 m2 að stærð og útbúið fullkomnum tækjabúnaði, meðal annars tölvustýrðum sýndarsjúklingum, fjölda hlutherma auk margvíslegra möguleika til gagnvirkrar kennslu með nýjustu tækni.

Markmiðið með starfsemi Færnisetursins er að nemendur í heilbrigðisvísindum fái kennslu og þjálfun í flestu því sem snýr að meðferð sjúklinga. Í Færnisetrinu er kennt í öruggum aðstæðum og hægt að endurtaka viðfangsefni eins oft og þörf krefur. Þar er líkt eftir raunverulegum aðstæðum og nemendur undirbúnir eins vel og kostur er fyrir störf á heilbrigðisstofnunum. Til að mynda er hægt að kenna og þjálfa viðbrögð við sjaldgæfum aðstæðum og bráðatilfellum og þannig efla öryggi sjúklinga.

Heilbrigðisvísindasvið er eitt af fimm fræðasviðum Háskóla Íslands. Innan sviðsins eru sex deildir; Hjúkrunarfræðideild, Lyfjafræðideild, Læknadeild, Matvæla- og næringarfræðideild, Sálfræðideild og Tannlæknadeild. Starfsmenn sviðsins eru um 300 og nemendur um 2200.

Háskóli Íslands er stærsta kennslu-, rannsókna- og vísindastofnun Íslands og eini skólinn hérlendis sem er á báðum virtustu matslistunum yfir bestu háskóla heims, Times Higher Education World University Rankings og Shanghai Ranking.

Starfshlutfall er 70%
Umsóknarfrestur er til og með 21.08.2020


Nánari upplýsingar veitir
Herdís Sveinsdóttir - [email protected] - 525-4971


Háskóli Íslands
Hjúkrunarfræðideild
Eiríksgötu 34
101 Reykjavík


Smellið hér til að sækja um starf

 

Efnisorð

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Þessi síða notar vafrakökur Lesa meira