Hoppa yfir valmynd

Endurgreiðslur til annarra stjórnvalda á grundvelli laga um félagsþjónustu sveitarfélaga og barnaverndarlaga

Endurgreiðslur til sveitarfélaga vegna fjárhagsaðstoðar við erlenda ríkisborgara

Ríkissjóður endurgreiðir sveitarfélögum fjárhagsaðstoð vegna aðstoðar við erlenda ríkisborgara, sem hafa átt lögheimili á Íslandi í tvö ár eða skemur eða eru án lögheimilis og í sérstökum aðstæðum hér á landi. Endurgreiðslan á sér stað á grundvelli 15. gr. laga um félagsþjónustu sveitarfélaga nr. 40/1991, sbr. einnig reglur nr. 735/2018.

Velferðarráðuneyti setur sérstök viðmið um fjárhagsaðstoð við erlenda ríkisborgara sem ekki eiga lögheimili hér á landi, sbr. 3. gr. reglnanna. Viðmiðin eru endurskoðuð einu sinni á ári og má  nálgast í fylgiskjali við reglurnar. Erlendir ríkisborgarar, án lögheimilis, sem falla undir reglurnar og telja sig ekki eiga möguleika á að fara úr landi eða framfleyta sér hér á landi án aðstoðar íslenskra stjórnvalda geta snúið sér til félagsþjónustunnar í dvalarsveitarfélagi og óskað eftir fjárhagsaðstoð. Félagsþjónusta sækir um vilyrði fyrir endurgreiðslu úr ríkissjóði til Gæða- og eftirlitsstofnunar félagsþjónustu og barnaverndar. Stofnunin leggur mat á umsókn og veitir sveitarfélagi ráðgjöf og leiðbeiningar um vinnslu máls, eftir atvikum. Umsókn um endurgreiðslu er samþykkt sé skilyrðum umsóknarinnar fullnægt. 

Endurgreiðslur til sveitarfélaga vegna fylgdarlausra barna

Ef barn á ekki lögheimili hér á landi eða er hér án forsjáraðila sinna, endurgreiðir ríkissjóður sveitarstjórn þeirrar barnaverndarnefndar sem fer með mál barnsins útlagðan kostnað sem af máli hlýst,  sbr. 5. mgr. 15. gr. barnaverndarlaga, nr. 80/2002. Ef barni sem er hér á landi án forsjáraðila sinna er veitt alþjóðleg vernd eða dvalarleyfi á Íslandi greiðir ríkissjóður kostnað viðkomandi barnaverndarnefndar vegna ráðstöfunar barnsins í fóstur eða aðra vistun, samkvæmt ákvæðum laganna. Sveitarfélag sendir Gæða- og eftirlitsstofnun félagsþjónustu og barnaverndar yfirlit yfir útlagðan kostnað og kvittunum ásamt stuttum greinagerðum um aðstæður barnanna. Stofnunin fer yfir yfirlitið og samþykkir endurgreiðslu kostnaðar samkvæmt kvittunum. Unnið er að breytingum á verklaginu á grundvelli reglugerðarákvæðis í 15. gr. barnaverndarlaganna um endurgreiðslu kostnaðar vegna þessara mála sem sett var inn í lögin þann 1. janúar 2017.

Endurgreiðslur til utanríkisráðuneytisins vegna íslenskra ríkisborgara í neyð erlendis

Íslenskur ríkisborgari sem þarf á aðstoð að halda vegna sérstakra aðstæðna, óvæntra atburða eða áfalla sem hann verður fyrir meðan á tímabundinni dvöl erlendis stendur, getur sótt um fjárhagslega neyðaraðstoð til heimferðar. Endurgreiðslan, sem greidd er úr ríkissjóði, á sér stað á grundvelli 66. gr. laga um félagsþjónustu sveitarfélaga nr. 40/1991. Sótt er um aðstoðina hjá umboðsmanni íslenska ríkisins í erlendu dvalarríki. Umboðsmaður veitir utanríkisráðuneytinu upplýsingar um framkomna umsókn. Utanríkisráðuneytið leggur mat á hvort skilyrði til fjárhagslegrar neyðaraðstoðar til heimferðar séu uppfyllt. Mæli utanríkisráðuneytið með því að viðkomandi fái aðstoð til heimferðar, sendir það stofnuninni umsóknina ásamt sundurliðaðri kostnaðaráætlun. Stofnunin tekur ákvörðun um afgreiðslu.

 

Sjá einnig:

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn


Þessi síða notar vafrakökur Lesa meira