Starfsleyfi

Sjá nánar um starfsleyfisskyldu einkaaðila undir flipanum Almennt um starfsleyfi hér að ofan.

• Sótt er um starfsleyfi á eyðublaðavef Stjórnarráðsins.

Á umsóknareyðublaðinu sem er að finna á eyðublaðavef Stjórnarráðsins er gerð grein fyrir því hvaða gögnum þarf að skila en það er mismunandi eftir því hvernig þjónustu sótt er um starfsleyfi til að reka.

Það er bara nauðsynlegt að fylla út upplýsingar um forsvarsmann þegar það er rekstraraðili sem er með sérstaka kennitölu fyrir reksturinn sem sækir um starfsleyfi, það er t.d. einkahlutafélag eða sjálfseignarstofnun. Ef einstaklingur sækir um starfsleyfi, t.d. vegna umsýslu með NPA samningi þarf ekki að fylla út upplýsingar um forsvarsmann. Forsvarsmaður og umsækjandi eru þá sami aðilinn.

Hægt er að skoða umsókn sem hefur verið send. Þá er farið inn á eyðublaðavef Stjórnarráðsins og notað sama auðkenni (notendanafn og lykilorða eða rafræn skilríki) og notað var þegar umsóknin var send. Þar er valinn flipinn Mín mál, samanber myndina.

Eftir að umsókn hefur verið send er hægt að nálgast hana undir flipanum ,,Mín mál“ á eyðublaðavef Stjórnarráðsins. Hægt er að bæta við athugasemd eða fylgiskjali.  

Hyggist einstaklingur eða félag sem hlotið hefur starfsleyfi gera breytingar á rekstri sínum þarf að tilkynna um slíkt til Gæða- og eftirlitsstofnunar félagsþjónustu og barnaverndar, sbr. 10. gr. reglugerðar um starfsleyfi til einkaaðila sem veita félagsþjónustu nr. 1320/2020 og 10. gr. reglugerðar um starfsleyfi til einkaaðila sem veita þjónustu við fatlað fólk nr. 856/2020. Tilkynna skal slíkar breytingar á þar til gerðu eyðublaði á eyðublaðavef Stjórnarráðsins.

Hyggist starfsleyfishafi hætta rekstri þjónustu að hluta til eða að öllu leyti ber að tilkynna um það til Gæða- og eftirlitsstofnunar félagsþjónustu og barnaverndar sbr. 10. gr. reglugerðar um starfsleyfi til einkaaðila sem veita félagsþjónustu nr. 1320/2020 og 10. gr. reglugerðar um starfsleyfi til einkaaðila sem veita þjónustu við fatlað fólk nr. 856/2020. Vakin er athygli á því að ef starfsemi starfsleyfishafa er bundin við ákveðið húsnæði þar sem Gæða- og eftirlitsstofnun hefur veitt heimild til að reka starfsemina en starfsleyfishafi ákveður að hætta rekstri starfsemi í húsnæðinu er það tilkynningaskylt samkvæmt ákvæðinu. Tilkynna skal um lok þjónustu á þar til gerðu eyðublaði á  eyðublaðavef Stjórnarráðsins.

Þegar það liggur fyrir samkomulag um úthlutun vinnustunda vegna samnings um notandastýrða persónulega aðstoð er hægt að sækja um starfsleyfi til að hafa umsýslu með framkvæmd samningsins. Samkomulagið skal þá vera undirritað af fulltrúa sveitarfélags og notanda eða fulltrúa notanda ef notandi er ólögráða eða er ekki fær um skrifa undir sjálfur.