Skýrsla verkefnisstjórnar um nýskipan lögreglumála
Fréttatilkynning
Nr. 6/ 2005
Verkefnisstjórn um nýskipan lögreglumála, sem Björn Bjarnason dóms- og kirkjumálaráðherra skipaði 4. nóvember 2003, skilaði í dag skýrslu sinni um nýskipan lögreglumála til ráðherra. Verkefnisstjórninni var með skipunarbréfi falið tvíþætt meginhlutverk. Í fyrsta lagi að koma með hugmyndir að nýju skipulagi sem hafi það að markmiði að styrkja og efla starfsemi lögreglu og sýslumanna auk þess að bæta nýtingu þeirra fjármuna sem til embættanna er varið og í öðru lagi að móta löggæsluáætlun til næstu ára, þar sem kynnt væri forgangsröð við úrlausn verkefna og sett mælanleg markmið fyrir löggæsluna. Jafnframt var verkefnisstjórninni falið að meta reynsluna af lögreglulögunum og því skipulagi og verkaskiptingu sem þá kom til sögunnar, hafa til hliðsjónar þá vinnu við gerð reiknilíkans fyrir rekstur sýslumannsembætta sem unnin hefur verið undanfarin ár, taka afstöðu til sjónarmiða sem fram hafa komið að undanförnu um ákæruvaldið svo og skilgreiningu á rannsóknarlögreglu í lögum o.fl.
Skýrsla verkefnisstjórnarinnar skiptist í þrjá meginkafla auk inngangs, samantektar, heimildarskrár og fjögurra viðauka. Í meginköflunum þremur er í fyrsta lagi reynt að gefa greinargott yfirlit yfir stöðu mála í dag, þær breytingar sem orðið hafa á liðnum árum og leggja mat á þær breytingar. Í öðru lagi eru gerðar tillögur að efnisatriðum í löggæsluáætlun til næstu ára, þ.e. hvaða meginatriði lögreglan á Íslandi ætti að leggja áherslu á í störfum sínum. Í þriðja lagi er í skýrslunni rakið með hvaða hætti væri æskilegt að styrkja og efla lögregluna með skipulagsbreytingum, aukinni samvinnu, efldri stjórnun og fleira. Þar er einnig fjallað sérstaklega um eflingu annarra þátta í starfsemi sýslumanna en löggæslu, hlutverk ríkislögreglustjóra, skipulag ákæruvaldsins o.fl. Þá er einnig í skýrslunni fjallað um stjórnskipulag, notkun árangursstjórnunarsamninga og önnur atriði sem tengjast stjórnun og stefnumótun.
Efni skýrslunnar var kynnt á fundi dóms- og kirkjumálaráðherra með forstöðumönnum stofnana ráðuneytisins sl. fimmtudag. Fram kom í máli ráðherra á þeim fundi að hann hefði ekki tekið afstöðu til þeirra sjónarmiða sem fram koma í skýrslunni. Áður en að því kæmi vildi hann fá tækifæri til að efna til funda um málið sérstaklega með sýslumönnum og lögreglumönnum. Með þeim orðum væri hann ekki að skorast undan því að fylgja málinu eftir, enda væri hann eindreginn talsmaður þess að leitað væri skynsamlegra leiða til að efla og styrkja lögregluna og í skýrslunni væru reifaðar margar tillögur um það efni. Mikilvægt væri að breið samstaða yrði um allar breytingar á skipan lögreglumála.
Verkefnisstjórnina skipuðu Stefán Eiríksson skrifstofustjóri í dóms- og kirkjumálaráðuneyti sem jafnframt var formaður, Ragnheiður Ríkharðsdóttir bæjarstjóri í Mosfellsbæ og Skúli Magnússon héraðsdómari við héraðsdóm Reykjavíkur.
Skýrslan er í heild sinni aðgengileg á heimasíðu ráðuneytisins, www.domsmalaraduneyti.is. Allar nánari upplýsingar veitir Stefán Eiríksson, skrifstofustjóri.
Í dóms- og kirkjumálaráðuneytinu,
31. janúar 2005.
Skýrsla verkefnisstjórnar um nýskipan lögreglumála - skýrslan í heild (PDF 1,2MB)
Skýrslan er birt hér að neðan kaflaskipt:
-
Skýrsla verkefnisstjórnar um nýskipan lögreglumála viðauki I (PDF 141k)
Tillögur um nýskipan lögreglumála
– Skýrsla Ólafs K. Ólafssonar sýslumanns Snæfellinga -
Skýrsla verkefnisstjórnar um nýskipan lögreglumála viðauki II (PDF 279k)
Hugmyndir að nýju skipulagi lögreglu með fækkun lögregluumdæma
– Skýrsla Jónmundar Kjartanssonar yfirlögregluþjóns hjá embætti Ríkislögreglustjóra -
Skýrsla verkefnisstjórnar um nýskipan lögreglumála viðauki III (PDF 98k)
Skipulag lögreglu
– Skýrsla Kjartans Þorkelssonar sýslumanns á Hvolsvelli
-
Skýrsla verkefnisstjórnar um nýskipan lögreglumála viðauki IV (PDF 108k)
Framtíðarsýn lögreglunnar á Íslandi
– Skýrsla Karls Steinars Valssonar aðstoðaryfirlögregluþjóns hjá lögreglustjóranum í Reykjavík