Hoppa yfir valmynd
28. júní 2007 Háskóla-٫ iðnaðar- og nýsköpunarráðuneytið

Afnámi einkaréttar í póstdreifingu frestað

Samgöngunefnd Evrópuþingsins hefur ákveðið að fresta um tvö ár afnámi einkaréttar í póstdreifingu sem taka átti gildi í ársbyrjun 2009 og mun hún því fyrst taka gildi 2011. Einkaréttarmörkin voru fyrst ákveðin fyrir bréf undir 350 grömmum og þau síðan lækkuð í 100 g og í 50 g frá ársbyrjun 2006.

Árið 1997 var sett tilskipun um póstþjónustu í aðildarríkjum Evrópusambandsins og hefur hún verið felld inn í íslenska löggjöf með setningu laga og reglugerða, fyrst 1998 og síðan 2003 og 2005. Íslensk stjórnvöld munu fylgjast áfram náið með þróuninni á sviði póstmála hjá Evrópusambandinu.

Markmiðið með tilskipuninni var að tryggja bestu mögulegu póstþjónustu í aðildarríkjum ESB með það að leiðarljósi að frelsi yrði á póstmarkaðnum frá árinu 2009. Framkvæmdastjórnin hefur fylgst með framvindu þjónustunnar á tímabilinu.

Nokkur ágreiningur hefur verið meðal ríkja ESB um hvenær skuli fella niður einkarétt í póstþjónustu og hafa sum viljað fresta því um nokkur ár. Á fundi samgöngunefndar Evrópuþingsins 18. júní var sú málamiðlun samþykkt að fresta afnámi einkaréttarins um tvö ár eða til ársloka 2010. Einnig eru undanþáguákvæði um að fresta afnámi einkaréttarins um tvö ár til viðbótar. Gilda þau um ný aðildarríki ESB og þau ríki sem búa við erfið landfræðileg skilyrði og eru strjálbýl. Gert er ráð fyrir að Evrópuþingið fjalli um þessa samþykkt þingnefndarinnar í næsta mánuði.



Efnisorð

Var efnið hjálplegt?
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn
Ruslvörn
Vinsamlegast svaraðu í tölustöfum