Staða stefnumótunar og áætlanagerðar innan Stjórnarráðsins - niðurstöður könnunar
Sumarið 2015 var framkvæmd könnun á stöðu stefnumótunar og áætlanagerðar innan Stjórnarráðsins. Könnunin var unnin að frumkvæði stefnuráðs Stjórnarráðsins í samráði við aðra fulltrúa ráðsins (öll ráðuneyti). Tilgangur hennar var að fá yfirsýn yfir þekkingu og getu starfsmanna auk þess sem gagnlegt er fyrir Stjórnarráðið að hafa grunnmælingu hvað viðvíkur stefnumótun og áætlanagerð nú þegar innleiðing nýrra laga um opinber fjármál er hafin. Þau lög gera einmitt ríka kröfu á ráðuneyti og stofnanir til stefnumótunnar og áætlanagerðar. Könnunin var lauslega byggð á könnun sem stefnuráðið í Bretlandi lagði fyrir ráðherra, sérfræðinga í stefnumótun og stjórnendur innan stjórnsýslunnar í Bretlandi árið 2013. Jafnframt var stuðst við Handbók um opinbera stefnumótun og áætlanagerð (Stjórnarráð Íslands, 2013) og stefnusniðmát sem sett var saman árið 2011 við greiningu á stefnum og áætlunum ríkisins. Alls var 131 stjórnendum og sérfræðingum boðið að taka þátt, nánar tiltekið 56 stjórnendum og 75 sérfræðingum. Af þeim svöruðu 98, sem samsvarar 75% svarhlutfalli.