Hoppa yfir valmynd
K%C3%A6runefnd %C3%BAtbo%C3%B0sm%C3%A1la

Mál nr. 29/2020B. Ákvörðun kærunefndar útboðsmála.

Ákvörðun kærunefndar útboðsmála 12. ágúst 2020
í máli nr. 29/2020B:
Mannvit hf.
gegn
Reykjavíkurborg
Veitum ohf.
Mílu ehf.
Gagnaveitu Reykjavíkur ehf.
og Eflu hf.

Lykilorð
Endurupptaka. Útboðsgögn. Stöðvun samningsgerðar aflétt.

Útdráttur
Aflétt var banni við samningsgerð í kjölfar útboðsins „Tryggvagata og Naustin Endurgerð 2020-2021 Eftirlit“.

Með kæru 30. júní 2020 kærði Mannvit hf. útboð innkaupadeildar Reykjavíkurborgar fyrir hönd umhverfis- og skipulagssviðs Reykjavíkurborgar, Veitna ohf., Mílu ehf. og Gagnaveitu Reykjavíkur ehf. (hér eftir vísað til sem varnaraðila) „Tryggvagata og Naustin Endurgerð 2020-2021 Eftirlit“. Kærandi krefst þess aðallega að ákvörðun varnaraðila um að velja tilboð Eflu hf. í hinu kærða útboði verði felld úr gildi. Jafnframt er gerð krafa um að nefndin veiti álit á skaðabótaskyldu varnaraðila og að varnaraðila verði gert að greiða málskostnað. Varnaraðili krefst þess að öllum kröfum verði hafnað og kæranda gert að greiða málskostnað.

Með ákvörðun kærunefndar útboðsmála 17. júlí 2020 hafnaði nefndin kröfu varnaraðila um að aflétt yrði banni við samningsgerð milli varnaraðila og Eflu hf. í kjölfar útboðsins. Með tölvupósti 24. júlí sl. kröfðust varnaraðilar þess að ákvörðun nefndarinnar yrði endurupptekin. Kæranda og hagsmunaaðila var gefinn kostur á að tjá sig um beiðnina. Í þessum þætti málsins tekur nefndin afstöðu til kröfu varnaraðila um endurupptöku þeirrar ákvörðunar að hafna því að sjálfkrafa stöðvun samningsgerðar verði aflétt, en úrlausn málsins bíður að öðru leyti endanlegs úrskurðar.

Í maí 2020 auglýsti varnaraðili útboð sem miðaði að því að gera samning um eftirlit með öllum framkvæmdum varnaraðila vegna endurgerðar Tryggvagötu, milli Grófar og Pósthússtrætis, og Nausta, milli Geirsgötu og Tryggvagötu. Eftirlitið tekur til jarðvinnu, lagnavinnu og yfirborðsfrágangs en einnig öryggis- og aðgengismála. Grein 0.1.3 í útboðsgögnum nefndist „kröfur til bjóðenda“ og var skipt niður í fjórar undirgreinar merktar A til D. Undirgrein A nefndist „kröfur um hæfni og reynslu“ og þar var fjallað um kröfur sem gerðar voru til boðinna starfsmanna eftir tilteknum flokkum. Fyrsti flokkurinn nefndist „Verkefnisstjóri“ og þar voru meðal annars gerðar kröfur um að verkefnisstjóri hefði 10 ára reynslu, hefði unnið að sambærilegum verkum og lokið tilteknum námskeiðum. Í flokknum „Eftirlitsmenn“ sagði meðal annars: „Miða skal við að bjóðandi hafi til ráðstöfunar minnst þrjá menn, í eftirliti með jarðvinnu, lagnavinnu og yfirborðsfrágangi. Einungis skal nefna þá sem eiga að vinna að eftirlitsverkinu.“ Kaflanum var svo skipt niður í undirkaflana „Eftirlitsmaður I“, „Eftirlitsmaður II“ og „Eftirlitsmaður í öryggismálum“. Síðasti flokkurinn nefndist „Mælingamaður“ og þar sagði meðal annars: „Gerð er krafa um að mælingamaður hafi a.m.k. 3 ára almenna starfsreynslu sem mælingamaður og að hann hafi annast mælingar við a.m.k. eitt sambærilegt útboðsverk. Eftirlitsmaður I eða II getur einnig verið mælingamaður ef hann uppfyllir kröfur um starfsreynslu sem mælingamaður“. Af útboðsgögnum, einkum grein 0.4.6 í útboðsgögnum og tilboðsblaði, verður ráðið að val tilboða skyldi ráðast af lægsta verði.

Alls bárust fjögur tilboð og við opnun þeirra 2. júní 2020 kom í ljós að kærandi átti lægsta tilboðið að fjárhæð 25.105.500 krónur en Efla hf. næst lægsta tilboð að fjárhæð 25.137.500 krónur. Kostnaðaráætlun varnaraðila var 30.000.000 króna. Með tölvupósti 26. júní 2020 tilkynnti varnaraðili að tilboð Eflu hf. hefði verið valið og að tilboð kæranda hefði ekki talist uppfylla kröfur sem fram kæmu í grein 0.1.3 í útboðsgögnum. Ástæðan var sú að í tilboðinu hefði verið „stillt upp verkefnastjóra og tveimur eftirlitsmönnum“ en gögnin hafi gert kröfu um fjögur stöðugildi að lágmarki.

Kærandi byggir á því að útboðsgögn komi ekki í veg fyrir að einn og sami maðurinn fari með fleiri en eitt hlutverk og hvergi komi fram að bjóða skuli að lágmarki fjóra starfsmenn til þess að fullnægja kröfum samkvæmt grein 0.1.3 í útboðsgögnum. Þá telur kærandi að jafnvel þótt útboðsgögn yrðu túlkuð með þeim hætti sem varnaraðilar byggi á þá hafi borið að gefa kæranda kost á að bæta úr annmörkum á tilboðinu. Varnaraðili telur að útboðsgögn hafi gert skýran áskilnað um a.m.k. fjóra starfsmenn og ekki sé skylt að gefa kæranda kost á að bæta úr slíkum annmarka á tilboði.

Niðurstaða

Í ákvörðun kærunefndarinnar 17. júlí sl. var byggt á því að hin kærðu innkaup hefðu verið yfir viðmiðunarfjárhæðum á Evrópska efnahagssvæðinu, sbr. 4. mgr. 23. gr. laga nr. 120/2016 um opinber innkaup, og því hafi verið rétt að auglýsa innkaupin á öllu svæðinu með milligöngu útgáfuskrifstofu Evrópusambandsins. Byggði ákvörðunin á því að hið kærða útboð stefndi að öllum líkindum að gerð þjónustusamnings og að kostnaðaráætlun varnaraðila væri 30.000.000 krónur en viðmiðunarfjárhæð vegna skyldu sveitarfélaga og stofnana þeirra til útboðs á Evrópska efnahagssvæðinu væru 27.897.000 krónur vegna þjónustusamninga. Þegar af þeirri ástæðu taldi kærunefnd útboðsmála verulegar líkur á því að hið kærða útboð hefði brotið í bága við lög eða reglur um opinber innkaup sem leitt gæti til ógildingar útboðsins og þar með ákvörðunar um val á tilboði. Kostnaðaráætlun varnaraðila og útboðsgögn miðuðu við að verð væru með virðisaukaskatt en í ákvörðun nefndarinnar var ekki gert ráð fyrir því. Samkvæmt 1. mgr. 25. gr. laga um opinber innkaupa skal útreikningur á áætluðu virði samnings miða við þá heildarfjárhæð sem kaupandi mun greiða fyrir innkaup, að frátöldum virðisaukaskatti. Að þessu virtu var niðurstaða kærunefndarinnar í fyrrnefndri ákvörðun byggð á röngum upplýsingum um málsatvik. Ef virðisaukaskattur er dreginn frá kostnaðaráætlun og tilboðum sem bárust er ljóst að innkaupin eru undir fyrrnefndum viðmiðunarfjárhæðum og því eru skilyrði til þess að endurupptaka ákvörðunina, sbr. 1. tölul. 1. mgr. 24. gr. stjórnsýslulaga nr. 37/1993.

Í kafla 0.1.3 í útboðsgögnum var eins og áður segir gerð krafa um verkefnisstjóra eftirlits, eftirlitsmann I og II, eftirlitsmann öryggismála og mælingamann. Í gögnunum kom svo meðal annars fram að bjóðendur skyldu hafa til ráðstöfunar minnst þrjá menn í eftirliti. Kærunefnd útboðsmála telur að bjóðendur hafi mátt skilja það sem svo að þrír menn yrðu að sinna hlutverkum eftirlitsmanna, þ.e. eftirlitsmaður I, eftirlitsmaður II og eftirlitsmaður í öryggismálum. Samkvæmt tilboði kæranda var einungis gert ráð fyrir tveimur starfsmönnum í hlutverk eftirlitsmanna þar sem sami maðurinn skyldi sinna hlutverki eftirlitsmanns I og eftirlitsmanns í öryggismálum. Tilboð kæranda uppfyllti þannig ekki skilyrði útboðsgagna. Að virtu eðli þess annmarka sem var á tilboði kæranda að þessu leyti verður, eins og mál þetta liggur fyrir nú, ekki talið að varnaraðila hafi verið skylt að gefa honum tækifæri til þess að bæta úr annmarkanum samkvæmt 5. mgr. 66. gr. laga nr. 120/2016 eða öðrum ákvæðum laganna. Að virtum þeim gögnum sem nú liggja fyrir nefndinni hefur kærandi því ekki leitt að því verulegar líkur að varnaraðili hafi brotið gegn lögum um opinber innkaup sem getur leitt til ógildingar ákvörðunar eða annarra athafna varnaraðila, sbr. 1. mgr. 107. gr., sbr. 1. mgr. 110. gr. laga um opinber innkaup. Verður því fallist á kröfu varnaraðila um að aflétta þeirri sjálfkrafa stöðvun samningsgerðar sem komst á með kæru í máli þessu.

Ákvörðunarorð:

Ákvörðun kærunefndar útboðsmála frá 17. júlí 2020 í máli nr. 29/2020 er endurupptekin.

Banni við samningsgerð varnaraðila, innkaupadeildar Reykjavíkurborgar fyrir hönd umhverfis- og skipulagssviðs Reykjavíkurborgar, Veitna ohf., Mílu ehf. og Gagnaveitu Reykjavíkur ehf., og Eflu hf. í kjölfar útboðsins „Tryggvagata og Naustin Endurgerð 2020-2021 Eftirlit“ er aflétt.

Reykjavík, 12. ágúst 2020


Sandra Baldvinsdóttir

Auður Finnbogadóttir

Hildur Briem



Úrskurðir, ákvarðanir og aðrar úrlausnir sem birtast á vef Stjórnarráðsins eru á ábyrgð viðkomandi stjórnvalds. 
Stjórnarráðið ber ekki ábyrgð á efni frá sjálfstæðum stjórnvöldum umfram það sem leiðir af lögum.

Hafa samband

Ábending / fyrirspurn
Ruslvörn
Vinsamlegast svaraðu í tölustöfum