Hoppa yfir valmynd

Ræða eða grein fyrrum ráðherra

12. apríl 02 Atvinnuvega- og nýsköpunarráðuneytið

Fræðsluþing verktaka á Austurlandi

Valgerður Sverrisdóttir,
iðnaðar- og viðskiptaráðherra


Ávarp við setningu fræðsluþings verktaka á Austurlandi
11. apríl 2002.


Góðir þinggestir

Þegar þetta þing var undirbúið bjuggust flestir við því að tímasetningar varðandi Noral verkefnið myndu standast. Miðað við stöðu mála í dag þá eru ekki líkur á því. Það þýðir hins vegar ekki að við eigum að leggja árar í bát. Þvert á móti eigum við að halda áfram að vinna að undirbúningi þess að farið verði í Kárahnjúkavirkjun og byggingu álvers á Reyðarfirði.

Af hálfu stjórnvalda, sveitarfélaganna á svæðinu og Landsvirkjunar er málið eins vel undirbúið og frekast er kostur. Allir samningar liggja meira og minna fyrir í drögum og Alþingi samþykkti fyrr í þessari viku lög sem heimila iðnaðarráðherra að gefa út virkjanaleyfi vegna Kárahnjúkavirkjunar.

Sveitarfélögin á svæðinu hafa verið að styrkja innviði sína til undirbúnings stórframkvæmdum á Austurlandi og þau munu halda því áfram. Ráðuneytin munu, eftir því sem hægt er, aðstoða sveitarfélögin í þeirri vinnu sem er framundan. Þá hefur verið unnið að nauðsynlegum samgöngubótum. Í því sambandi má nefna að unnið er að endurbótum á veginum milli Reyðarfjarðar og Sómastaða, en áætlað er að sú framkvæmd kosti um 185 milljónir króna. Þá lýkur vegarframkvæmdum í Fljótsdal um mitt sumar en kostnaður við þær framkvæmdir nemur um 650 millj. kr. Áfram þarf að vinna að endurbótum á veginum milli Reyðarfjarðar og Eskifjarðar.

Athygli vekur að framangreind verkefni hafa öll komið í hlut austfirskra verktaka að undangengnu útboði. Þá liggur fyrir mat á umhverfisáhrifum vegna byggingar jarðganga milli Reyðarfjarðar og Fáskrúðsfjarðar. Unnið er að hönnun og forvalsgögn verða tilbúin í sumar. Stór verkefni eru því framundan á sviði samgangna á Austurlandi.

Vel hefur verið staðið að undirbúningi atvinnulífsins á Austurlandi fyrir uppbyggingu orkufreks iðnaðar. Faghópar skiluðu tillögum sínum í formi ályktana um miðjan nóvember sl. Í framhaldi af því var skipuð framkvæmdanefnd til að vinna að framgangi málsins. Fjárfestingarstofan orkusvið sem er í eigu iðnaðarráðuneytisins og Landsvirkjunar hefur stutt við bakið á þeirri vinnu sem fram hefur farið.

Góðir þinggestir

Undirbúningur að því að fá nýja aðila að uppbyggingu álversins er kominn í fullan gang. Sá mikli undirbúningur sem fram hefur farið mun hjálpa mikið í þeirri vinnu og það ætti ekki að taka marga mánuði áður en niðurstaða fæst um það hvort einhverjir aðrir en Norsk Hydro og Reyðarál hafi áhuga á að koma að þessu verkefni. Ég er bjartsýn á að verkefnið muni ná fram að ganga og tel fulla ástæða fyrir austfirska verktaka og atvinnulífið í heild að halda áfram að vinna að nauðsynlegum undirbúningi. Ég vona að þingið í dag muni verða til þess að styrkja þennan undirbúning en frekar.

Með þessum orðum segi ég fræðsluþingið sett.



Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn
Ruslvörn


Þessi síða notar vafrakökur Lesa meira