Samráð

Ráðuneytið leggur ríka áherslu á að eiga gott samstarf og samráð um málaflokka sína. Að baki stefnumótun og áætlanagerð liggur mikill undirbúningur og víðtækt samstarf við önnur ráðuneyti, stofnanir, atvinnulíf og almenning.

Samgöngu- og sveitarstjórnarráðuneytið birti alls 54 mál til umsagnar í samráðsgátt stjórnvalda árið 2020 - áform um lagasetningu, drög að frumvörpum til laga, drög að reglugerðum, stefnum o.fl., sjá yfirlit yfir mál ráðuneytisins árið 2020 hér í samráðsgáttinni (hægt að flokka eftir tegund máls).

Markmið samráðsgáttarinnar er að auka gagnsæi og möguleika almennings og hagsmunaaðila á þátttöku í stefnumótun, reglusetningu og ákvarðanatöku opinberra aðila. Þar er á einum stað hægt að finna öll mál ráðuneyta sem birt eru til samráðs við almenning og öllum er frjálst að senda inn umsögn eða ábendingu.