Ráðherra þakkaði þann heiður að fá að taka þátt í athöfninni. Hann rakti í nokkrum orðum sögu ostaframleiðslu og ostaneyslu á Íslandi á síðustu áratugum og kallaði þessa sögu sannkallaða sigurgöngu. Hann rakti mikilvægi nýsköpunar, vöruþróunar, rannsókna og markaðsstarfs í þessari sögu. Hann sagði að hér væri um sannkallaðan þekkingariðnað að ræða og atvinnugrein í fremstu röð í landinu. Hann minntist þess að þetta er unnið landsmönnum til hollustu og gagns og um leið til munaðar og yndisauka í lífinu. Rómverskt skáld kvað að sá nær mestum árangri sem blandar saman gagnsemi og hollustu og yndi og sætleika. Þetta á líka við um íslenska osta. Einhver mikilvægasti þátturinn í þessu eru gæði, gæðastjórnun og gæðaþróun sem ævinlega hafa verið og eru ráðandi einkenni á íslenskri ostaframleiðslu. Loks óskaði hann þjóðinni til hamingju með íslenska ostaframleiðslu í bráð og lengd.

Að ávarpi loknu afhenti ráðherra verðlaun til ostameistara sem skarað höfðu fram úr.