Guðmundur Ingi Guðbrandsson er félags- og vinnumarkaðsráðherra frá 28. nóvember 2021. Hann er jafnframt samstarfsráðherra Norðurlandanna.

Guðmundur Ingi gegndi embætti umhverfis- og auðlindaráðherra frá 30. nóvember 2017-28. nóvember 2021 sem utanþingsráðherra fyrir Vinstrihreyfinguna – Grænt framboð. Guðmundur Ingi var kjörinn alþingismaður fyrir Vinstri græn í Suðvesturkjördæmi 25. september 2021.  

Guðmundur Ingi fæddist 28. mars 1977 á Brúarlandi á Mýrum. Hann er með BSc próf í líffræði frá Háskóla Íslands og mastersgráðu í umhverfisfræðum frá Yale háskóla í Bandaríkjunum. Hann var  framkvæmdastjóri Landverndar 2011-2017 en starfaði áður við rannsóknir í vist- og umhverfisfræðum við Háskóla Íslands og við alþjóðamál og rannsóknir hjá Landgræðslu ríkisins. Þá starfaði hann á Veiðimálastofnun á Hólum í Hjaltadal á námsárum sínum. Guðmundur Ingi hefur verið stundakennari í nokkrum námskeiðum við Háskóla Íslands, Landbúnaðarháskóla Íslands og Háskólasetur Vestfjarða síðan 2006. Guðmundur Ingi hefur einnig starfað sem landvörður á Þingvöllum og í Vatnajökulsþjóðgarði.

Guðmundur Ingi tók þátt í að stofna Félag umhverfisfræðinga á Íslandi og var fyrsti formaður félagsins frá 2007 til 2010. Guðmundur Ingi var formaður Félags Fulbright styrkþega á Íslandi 2017-2018.