Sveitin leggur af stað til Tyrklands í kvöld
Sigurður Ólafur Sigurðsson / Slysavarnafélagið LandsbjörgUpphaflega stóð til að flugvél Landhelgisgæslunnar TF-SIF flygi með hópinn í dag en vegna óhagstæðra veðurskilyrða á leiðinni varð að fresta brottför til morguns. Sökum þess að unnið er í kapp við tímann á vettvangi og hver mínúta skiptir þar máli var ákveðið að semja í staðinn við Icelandair um að flytja hópinn til Tyrklands strax í kvöld. Flugvél Icelandair getur flogið þangað án millilendingar og er gert ráð fyrir að hún verði komin á áfangastað í fyrramálið.
Sérfræðingasveitin starfar innan vébanda Slysavarnafélagsins Landsbjargar. Um er að ræða aðgerðastjórnendur, verkfræðinga og stuðningsteymi. Ísland er virkur þáttakandi sérstaks samstarfsvettvangs á vegum Sameinuðu þjóðanna um rústabjörgun (INSARAG) og er sveitin á viðbragðslista hans.
Stjórnvöld í Tyrklandi hafa óskað eftir aðstoð vegna hamfaranna sem þar hafa dunið yfir og hafa hjálparbeiðnir borist bæði í gegnum viðbragðskerfi Sameinuðu þjóðanna og Atlantshafsbandalagsins. Til viðbótar við stuðning við hjálpar- og björgunarstarfið í Tyrklandi munu íslensk stjórnvöld styðja fórnarlömb jarðskjálftanna á Sýrlandi í gegnum alþjóðleg hjálparsamtök.