Hoppa yfir valmynd

Frétt

22. ágúst 2002 Fjármála- og efnahagsráðuneytið

Greiðsluafkoma ríkissjóðs janúar-júlí 2002. Greinargerð: 22. ágúst 2002

Greiðsluafkoma ríkissjóðs janúar-júlí 2002. (PDF 16K)

Nú liggja fyrir tölur um greiðsluafkomu ríkissjóðs fyrstu sjö mánuði ársins. Uppgjörið hér á eftir sýnir sjóðhreyfingar og er sambærilegt við almenn sjóðstreymisyfirlit. Tölurnar eru því ekki samanburðarhæfar við ríkisreikning eða fjárlög ársins sem eru sett fram á rekstrargrunni.

Handbært fé frá rekstri var neikvætt um 13,7 milljarða króna samanborið við 5,2 milljarða neikvæða stöðu á sama tíma í fyrra. Fjármunahreyfingar voru hins vegar jákvæðar um 6,2 milljarða króna í stað 2,4 milljarða neikvæðrar stöðu í fyrra. Þar munar mestu um sölu hlutabréfa í Landsbanka Íslands, en innstreymi vegna hlutafjársölu nam um 4,8 milljörðum króna. Auk þess hækkar innheimta afborgana um 3 milljarða frá sama tíma í fyrra.

Heildartekjur ríkissjóðs námu tæplega 131S milljarði króna og hækka um 8S milljarð frá fyrra ári, eða um tæplega 7%. Skatttekjur ríkissjóðs hækka mun minna, eða um 4%. Skýringin á þessum mismun felst fyrst og fremst í auknum tekjum af sölu eigna.

Greidd gjöld nema 142 milljörðum króna og hækka um 13,8 milljarða frá fyrra ári, eða um 10,8%. Útgjöld til félagsmála eru um 84 milljarðar, en þau vega tæplega 60% af heildarútgjöldum ríkissjóðs. Þar munar mestu um útgjöld til heilbrigðismála, sem nema 35,5 milljörðum króna og hækka um 4,9 milljarða króna frá fyrra ári. Ennfremur hækka greiðslur til almennrar stjórnsýslu og löggæslu um 1,8 milljarða og til fræðslumála um 1,4 milljarða. Almannatryggingar hækka um rúmlega 2 milljarða króna. Greiðslur til atvinnumála í heild hækka um tæpa 1,2 milljarða, eða innan við 6%. Vaxtagreiðslur hækka um tæpan 1,1 milljarð, eða sem nemur 7,8% milli ára.



Á árinu var tekið erlent langtímalán að fjárhæð 21,6 milljarðar króna. Ætlunin er að auka vægi langtímalána og því er gert ráð fyrir að erlend skammtímalán fari lækkandi á næstu mánuðum og hefur verið greitt niður af erlendum skammtímalánum fyrir um 3,7 milljarða króna það sem af er árinu. Lántökur innanlands námu rúmum 12 milljörðum króna. Á móti lántökum vega afborganir að fjárhæð 19,9 milljarðar þar sem rúmlega 10 milljarðar króna fóru til greiðslu erlends langtímaláns og 9,7 milljarðar króna voru vegna spariskírteina og ríkisvíxla. Þá voru 5,3 milljarðar greiddir til Lífeyrissjóðs starfsmanna ríkisins í því skyni að lækka framtíðarskuldbindingar ríkissjóðs. Greiðsluafkoma ríkissjóðs batnar milli ára, er nú neikvæð um 2,3 milljarða króna, samanborið við 6,5 milljarða neikvæða stöðu á sama tíma í fyrra.



Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum