Greiðsluafkoma ríkissjóðs janúar- ágúst 2004

Mánaðaruppgjör ríkissjóðs fyrir fyrstu átta mánuði ársins liggur nú fyrir. Við samanburð á rekstrarafkomu fyrri ára verður að hafa í huga að mánaðaruppgjörið er nú með breyttu sniði og hefur framsetning afkomuyfirlits verið færð nær almennum sjóðstreymisyfirlitum, frá og með janúar 2004. Þetta hefur þau áhrif að gjöldin verða um 5 milljörðum króna hærri en ella og því ekki samanburðarhæf við fyrri ár. Skatttekjur ríkissjóðs eru hins vegar færðar á sambærilegan máta og áður.

Greiðsluafkoma. Samkvæmt ágústuppgjöri reyndist handbært fé frá rekstri neikvætt um 7,4 milljarða króna sem er 11,7 milljörðum betri staðan en á sama tíma í fyrra. Áætlun fjárlaga gerði ráð fyrir um 4,7 milljarða króna lakari stöðu. Skýringin er sú að tekjur hækka um 4,4 milljarða umfram hækkun gjalda. Þá reyndust hreyfingar á viðskiptareikningum 0,3 milljörðum hagstæðari en gert var ráð fyrir.

Tekjur. Heildartekjur ríkissjóðs námu um 181 milljarði króna á fyrstu átta mánuðum þessa árs. Tekjur ríkissjóðs í heildina hækkuðu því um rúma 10 milljarða, frá sama tíma í fyrra, eða um 6,1%. Skatttekjur ríkisins námu um 170 milljörðum króna sem er heldur meiri innheimta en á síðasta ári eða um 12% að raungildi. Innheimtir skattar á tekjur og hagnað einstaklinga og lögaðila námu 53,4 milljörðum króna og hækkuðu um 10,4% frá sama tíma í fyrra. Aukning í innheimtu tryggingargjalda var svipuð eða um 10,3% á milli ára. Til samanburðar má nefna að launavísitala Hagstofunnar hækkaði um 4,3% á þessum sama tíma og neysluverðsvísitalan hækkaði um 2,9%. Innheimta eignaskatta hækkaði einnig á milli ára eða um 18,3% sem jafngildir um 15% raunhækkun. Af öðrum tekjuliðum ríkissjóðs má nefna að um 13,5% aukning var í innheimtu tekna af virðisaukaskatti og svipaða sögu er að segja af öðrum sköttum á vöru og þjónustu. Veruleg aukning var meðal annars í innheimtu vörugjalda af ökutækjum, eða 27,5%, sem endurspeglar aukinn innflutning bifreiða. Að öllu samanlögðu eru innheimtutölur fyrstu átta mánuði ársins í takt við þjóðhagsspá fjármálaráðuneytisins frá 1. október sl.

Gjöld. Gjöld fyrstu átta mánuði ársins nema 189,7 milljörðum króna og hækka um 12,8 milljarða milli ára, en að teknu tilliti til breyttrar færslu gjalda nemur hækkunin um 7,8 milljörðum króna, eða um 4,4%. Hækkun milli ára kemur að langmestu leiti fram í félagsmálum, eða 11,5 milljarðar. Undir þann málaflokk falla um ° hlutar af öllum útgjöldum ríkisins. Þannig hækka greiðslur til heilbrigðismála um 3,8 milljarða, hækkun almannatrygginga nemur 3,2 milljörðum og 2,3 milljarðar eru vegna fræðslumála. Hækkun til atvinnumála, 1,9 milljarðar króna skýrast nær alfarið af hærri framlögum til samgöngumála. Á móti kemur að vaxtagjöldin lækka um 1,5 milljarð milli ára.

Í heild eru greiðslurnar 6,3 milljörðum umfram áætlun fjárlaga og skýrast frávik einna helst af greiðslum til almannatrygginga sem eru 3,4 milljörðum umfram áætlun, sem að hluta til skýrist af tilfærslu milli mánaða. Útgjöld til samgöngumála eru 2 milljörðum umfram áætlun og framkvæmdir til menningarbygginga um 0,8 milljörðum, en í báðum tilvikum er verið að ganga á ónýttar fjárheimildir frá því í fyrra. Önnur frávik eru minni.

Lánamál. Lántökur námu 40,2 milljörðum króna en afborganir voru 29,6 milljarðar. Þá voru greiddir 5 milljarðar króna til Lífeyrissjóðs starfsmanna ríkisins í því skyni að lækka framtíðarskuldbindingar ríkissjóðs. Handbært fé ríkissjóðs lækkaði um 8,6 milljarða á fyrstu átta mánuðum ársins.

Sjóðstreymi ríkissjóðs janúar-ágúst

(Í milljónum króna)

 Tekjur ríkissjóðs janúar-ágúst

(Í milljónum króna)

Gjöld ríkissjóðs janúar-ágúst

(Í milljónum króna)