Heilbrigðis- og tryggingamálaráðuneytið og Heilbrigðisstofnun Suðurlands hafa ákveðið að ganga til samninga um aukna heimahjúkrunarþjónustu. Um er að ræða tilraunaverkefni til tveggja ára um aukna heimahjúkrunarþjónustu á Selfossi, í Hveragerði og Þorlákshöfn. Stefnt er að því að skipulögð heimhjúkrun verði veitt alla daga vikunnar. Hjúkrunarfræðingur yrði á bakvakt á næturnar vegna neyðartilvika. Gert er ráð fyrir að sameiginleg þjónusta verði á kvöldin og um helgar á Selfossi, í Hveragerði og í Þorlákshöfn.