Magnús Stefánsson félagsmálaráðherra segir að með nýrri reglugerð um skyldu atvinnurekenda til að gera áætlun um öryggi og heilbrigði á vinnustað sé ábyrgð vinnuveitenda aukin og kerfisbundnu vinnuverndarstarfi komið á. Meginmarkmið þess sé að greina áhættuþætti þannig að koma megi í veg fyrir slys og vinnutengda sjúkdóma.

Félagsmálaráðherra setti fjölsótta ráðstefnu Vinnueftirlits ríkisins um áhættumat og forvarnir á vinnustöðum á Grand hótel í gær með því að brýna stjórnvöld, atvinnurekendur og launafólk til að taka höndum saman um öryggi og góðan aðbúnað og hollustuhætti á vinnustöðum.

„Það hefur takmarkaða þýðingu að setja lög og gefa út reglugerðir ef skilningurinn á þörfinni er takmarkaður,“ sagði Magnús Stefánsson meðal annars í ávarpi sínu.

Á ráðstefnunni voru kynnt ný ákvæði reglugerðar nr. 920/2006 um skyldu atvinnurekenda til að gera áætlun um öryggi og heilbrigði á vinnustað.

„Þessa áætlun skal semja í samráði við öryggisverði eða öryggistrúnaðarmenn eða aðra fulltrúa starfsmanna,“ sagði félagsmálaráðherra. „Með henni verður markvisst unnið að stöðugum umbótum á vinnustaðnum undir stjórn og á ábyrgð atvinnurekandans. Hugsunin er sú að vinnuverndin verði eðlilegur þáttur í starfi fyrirtækisins sem hafi að leiðarljósi að starfsmenn geti verið í þjónustu þess árum saman, jafnvel alla starfsævina, án þess að andlegt eða líkamlegt atgervi verði fyrir skaða.“

Auk kynningar á framangreindri reglugerð greindu talsmenn fyrirtækja á ráðstefnunni frá reynslu sinni af áhættumati og forvörnum í starfi. Loks voru pallborðsumræður með þátttöku fulltrúa stjórnvalda, atvinnurekenda og launafólks.

• Ávarp ráðherra í heild sinni