Starfshópur um málefni er varða frístundahús, sem Magnús Stefánsson félagsmálaráðherra skipaði 21. júlí 2006, leggur til að samningar um leigu á lóð undir frístundahús kveði á um endurskoðun á leigu og forkaupsrétt leigjenda við sölu á leigulóð. Enn fremur leggur starfshópurinn til að farin verði hliðstæð leið og í fjöleignarhúsalögunum við úrlausn tiltekinna ágreiningsefna.

Starfshópurinn skilaði ráðherra tillögum sínum í formi frumvarps til laga um réttindi og skyldur eigenda og leigjenda lóða í skipulagðri frístundabyggð. Í frumvarpsdrögum starfshópsins er gert ráð fyrir að í samningum um kaup eða leigu á lóð undir frístundahús þurfi aðilar að taka afstöðu til tiltekinna lágmarksákvæða. Þannig er til dæmis lagt til að í samningum um leigu á lóð undir frístundahús þurfi samningsaðilar að taka afstöðu til endurskoðunar á leigu og forkaupsrétti leigjenda við sölu á leigulóð. Í skilabréfi starfshópsins til félagsmálaráðherra kemur fram að hópurinn hafi á fundum sínum fjallað um vanda í viðskiptum eigenda og leigjenda lóða undir frístundahús í skipulögðum frístundabyggðum við lok leigutíma. Þótt hópurinn hafi ekki litið svo á að það hafi verið hlutverk hans að gera tillögur um lausn á þess háttar ágreiningi sem upp er kominn bendir hann á að sértæk úrræði gætu brotið í bága við ákvæði stjórnarskrár um samningafrelsi og friðhelgi eignarréttarins.

Í drögum starfshópsins að lagafrumvarpi er lagt til að við úrlausn tiltekinna ágreiningsefna milli hagsmunaaðila innbyrðis í frístundabyggð verði farin hliðstæð leið og í fjöleignarhúsalögunum. Félög eigenda og leigjenda lóða í frístundabyggð verði vettvangur fyrir samskipti aðila um sameiginleg hagsmunamál. Samkvæmt frumvarpsdrögunum er lagt til að eigendur og leigjendur lóða í frístundabyggð geti skotið ágreiningsefnum með nokkrum takmörkunum til kærunefndar fjöleignarhúsamála. Starfshópurinn bendir á að kostir úrskurðarnefndar séu einfaldar málsmeðferðarreglur, skjótar úrlausnir og ódýr leið til að fá niðurstöðu í deiluefni. Enn fremur er gert ráð fyrir samráði sveitarfélaga við svæðisfélög í frístundabyggð. Starfshópurinn stendur einhuga að baki frumvarpsdrögunum.

Félagsmálaráðherra hefur ákveðið að senda frumvarpsdrög starfshópsins til umsagnar hagsmunasamtaka. Almenningi gefst jafnframt kostur á að koma á framfæri athugasemdum og ábendingum við frumvarpsdrögin á heimasíðu félagsmálaráðuneytisins. Eftir að umsagnarfrestur er úti verður farið yfir athugasemdir sem berast með það að markmiði að frumvarp til laga verði lagt fyrir Alþingi í haust.

Starfshópinn skipuðu Atli Már Ingólfsson, lögfræðingur í landbúnaðarráðuneytinu, Haraldur Benediktsson, formaður Bændasamtaka Íslands, Ingibjörg Halldórsdóttir, lögfræðingur í umhverfisráðuneytinu, Jana Friðfinnsdóttir, lögfræðingur hjá Sambandi íslenskra sveitarfélaga, Skúli Guðmundsson, skrifstofustjóri í dóms- og kirkjumálaráðuneytinu, og Sveinn Guðmundsson, framkvæmdastjóri Landssambands sumarhúsaeigenda. Formaður og fulltrúi félagsmálaráðherra var Gylfi Kristinsson, skrifstofustjóri í félagsmálaráðuneytinu.

• Frumvarpsdrögin má finna á samskiptatorgi ráðuneytisins