Staðfest tilfelli inflúensu A (H1N1) - „svínainflúensunnar“ - voru í morgun alls 1.008 í nítján ríkjum í heiminum samkvæmt upplýsingum Sóttvarnarstofnunar Evrópusambandsins (sjá nánar sundurliðun aftast í þessari tilkynningu).

Einkenni veikinnar eru enn sem komið er væg nema í Mexíkó. Dauðsföll sem rakin eru til veikinnar eru 23, þar af 22 í Mexíkó og eitt í Bandaríkjunum.

Á síðasta sólarhring voru staðfest 30 ný tilvik á Evrópska efnahagssvæðinu, þar af 24 á Spáni.

• Engin tilfelli inflúensu A (H1N1) hafa verið staðfest hér á landi en rétt er að minna á að hin árlega inflúensa, sem gekk hér í vetur, er enn í gangi á Íslandi og hafa nokkur slík tilfelli verið greind hér á síðustu dögum.
• Engir sjúklingar með alvarleg einkenni inflúensu hafa verið lagðir inn á Landspítalann núna um helgina.
• Viðbúnaðarstig vegna yfirvofandi heimsfaraldurs er óbreytt hér landi og ekki áformað að grípa til róttækari aðgerða en þegar hefur verið gert.

Alþjóðaheilbrigðisstofnunin mælir nú með að talað sé um inflúensu A (H1N1) í stað „svínainflúensu“.

Að gefnu tilefni skal tekið fram að embætti sóttvarnalæknis styðst við upplýsingar frá Sóttvarnastofnun Evrópusambandsins (ECDC) um útbreiðslu inflúensunnar. Þær er að finna á heimasíðu stofnunarinnar http://www.ecdc.europa.eu/. Tölum um útbreiðslu veikinnar frá Sóttvarnastofnuninni annars vegar og Alþjóðaheilbrigðismálastofnuninni hins vegar ber ekki saman í mörgum tilvikum en sóttvarnarlæknir telur upplýsingar hinnar fyrrnefndu áreiðanlegri og vísar til þeirra.

• Upplýsingar um inflúensuna og ráðstafanir í því sambandi er að finna á landlaeknir.is, almannavarnir.is, influensa.is og heimasíðum Sóttvarnarstofnuanr Evrópusambandsins - ECDC, http://www.ecdc.europa.eu/ og Alþjóðaheilbrigðismálastofnunarinnar - WHO, http://www.who.int/en/.
• Áréttað skal að birgðir sem íslensk heilbrigðisyfirvöld ráða yfir af lyfjum gegn inflúensu A (H1N1), 100.000 skammtar, eru annars vegar Tamiflu (80.000 skammtar) og Relenza (20.000 skammtar). Þetta er tekið fram hér vegna þess að dæmi eru um að í fjölmiðlum hafi verið fullyrt að allar birgðirnar væru Tamiflu-lyf en það er sem sagt ekki rétt.

Staðfest eru 1.008 sjúkdómstilvik inflúensu A (H1N1) að morgni 4. maí 2009