Dagur upplýsingatækninnar, UT-dagurinn, verður haldinn þriðjudaginn 19. maí næstkomandi. Af því tilefni er boðað til ráðstefnu þar sem fjallað verður um hvernig upplýsingatæknin geti nýst opinberum stofnunum, fyrirtækjum og almenningi í því endurreisnarstarfi sem fyrir höndum er í íslensku samfélagi.

Yfirskrift ráðstefnunnar er „Upplýsingatækni til endurreisnar“ og verður sérstaklega rakið hvernig upplýsingatækni getur hvort tveggja lækkað kostnað og aukið þjónustu, sé rétt að málum staðið. Kynnt verða upplýsingatækniverkefni þar sem góður árangur hefur náðst og sagt frá aðferðafræði sem beita má til að meta kostnað og ávinning af slíkum verkefnum.

Jóhanna Sigurðardóttir forsætisráðherra mun ávarpa ráðstefnuna. Meðal fyrirlesara verða Guðbjörg Sigurðardóttir, skrifstofustjóri í forsætisráðuneyti, sem ræðir meginþema ráðstefnunnar þ.e. hvernig upplýsingatæknin nýtist til endurreisnar, Jón Óskar Hallgrímsson, hagfræðingur hjá PricewaterhouseCoopers, sem sýnir hvernig minnka megi fyrirhöfn borgara við að sækja opinbera þjónustu, og Stefán Eiríksson, lögreglustjóri á höfuðborgarsvæðinu, og Halldór Halldórsson, framkvæmdastjóri LRH, sem munu segja frá því hvernig veita megi meiri þjónustu með minni tilkostnaði. Þá kynnir Halla Björg Baldursdóttir, verkefnastjóri í rafrænni stjórnsýslu hjá forsætisráðuneyti, verkfærakistu fyrir rafræna stjórnsýslu, Hjálmar Gíslason, framkvæmdastjóri Data Market, segir frá verðmætum sem liggja í opinberum gögnum, Kristján G. Guðmundsson, yfirlæknir hjá Heilsugæslunni í Glæsibæ, ræðir hvernig nýta megi Netið við heilbrigðisþjónustu og Maríanna Friðjónsdóttir, framkvæmda- og leikstjóri, sýnir hvernig Facebook og önnur samskiptasamfélög geti nýst við upplýsingamiðlun og kynningarstarf. Lokaorð flytur Sigrún Jóhannesdóttir, forstjóri Persónuverndar.

Þetta er í fjórða sinn sem forsætisráðuneytið heldur UT-daginn og ráðstefnu í tengslum við hann. Ráðstefnan verður haldin 19. maí frá 12:00 til 16:10 á Hótel Hilton Nordica. Auk forsætisráðuneytis standa Félag forstöðumanna ríkisstofnana, Samtök upplýsingatækni- fyrirtækja og Skýrslutæknifélags Íslands að ráðstefnunni að þessu sinni. Hér á vefnum má finna ítarlega dagskrá ráðstefnunnar og upplýsingar um skráningu.

Hægt er að skrá sig á vefnum sky.is, með tölvupósti á [email protected] eða í síma 553 2460.

Nánari upplýsingar veitir: Guðbjörg Sigurðardóttir, skrifstofustjóri í forsætisráðuneyti Sími: 545 8470; netfang: [email protected]