Síðastliðinn föstudag var undirritaður samningur milli Háskólans á Akureyri og Heilbrigðisstofnunar Austurlands um samvinnu við verknám nemenda á heilbrigðisvísindasviði HA. Annars vegar er um að ræða klínískt nám í hjúkrunarfræði og hins vegar vettvangsnám í iðjuþjálfun.

Álfheiður Ingadóttir heilbrigðisráðherra undirritaði samninginn ásamt fulltrúum Háskólans og Heilbrigðisstofnunarinnar á Egilsstöðum. „Það er mikilvægt að tryggja námsstöður á heilbrigðisstofnunum og sjúkrahúsum með þessum hætti,“ sagði Álfheiður Ingadóttir heilbrigðisráðherra. „Með því að leiða saman Háskólann á Akureyri og Heilbrigðisstofnun Austurlands náum við jafnframt að byggja upp og viðhalda þekkingu á landsbyggðinni – en það hefur sýnt sig að meirihluti þeirra sem stunda nám í heilbrigðisvísindum á Akureyri setjast síðan að á landsbyggðinni.“