Preneet Kaur, ráðherra utanríkismála Indlands, kemur í opinbera heimsókn til Íslands miðvikudaginn 1. september. Heimsóknin hefst á fundi með Össuri Skarphéðinssyni utanríkisráðherra en auk hans mun Kaur hitta forseta Íslands, Ólaf Ragnar Grímsson.

Kaur heimsækir Alþingi, hittir forseta Alþingis, Ástu Ragnheiði Jóhannesdóttur, og fundar með utanríkismálanefnd. Þá mun hún opna sendiráð Indlands á Íslandi, kynna sér starfsemi Hellisheiðarvirkjunar og heimsækja Árnessýslu, Akureyri og Mývatn.