Sigurður Ingi Jóhannsson, umhverfis- og auðlindaráðherra, hefur á undanförnum þremur vikum haldið áfram heimsóknum sínum í stofnanir ráðuneytisins.

Á þeim tíma hefur ráðherra heimsótt Íslenskar orkurannsóknir (ÍSOR), Landmælingar Íslands, Náttúrufræðistofnun Íslands, Skipulagsstofnun, Stofnun Vilhjálms Stefánssonar, setur Náttúfurfræðistofnunar og útibú Umhverfisstofnunar á Akureyri auk þess sem hann kynnti sér starfsemi skrifstofu tveggja vinnuhópa (CAFF og PAME) sem heyra undir Norðurskautsráðið og eru með aðsetur á Akureyri og Vesturlandsskóga á Hvanneyri.

Ráðherra tók um miðjan ágúst upp þráðinn þar sem frá var horfið í vor varðandi heimsóknir í stofnanir umhverfis- og auðlindaráðuneytisins og hefur nú heimsótt þær velflestar. Fyrr í sumar kynnti hann sér starfsemi Mannvirkjastofnunar, Umhverfisstofnunar í Reykjavík, Úrvinnslusjóðs, Vatnajökulsþjóðgarðs, Veðurstofunnar og Veiðimálastofnunar.

Heimsóknirnar hafa reynst ákaflega gagnlegar og mikilvægar fyrir ráðherra til að fá yfirlit yfir starfsemi þessara stofnana og hitta fyrir starfsfólk þeirra.