Komin er út skýrsla Vitundarvakningar um kynferðislegt, andlegt og líkamlegt ofbeldi gegn börnum um starfsemina árin 2012-2014 en hún hefur einnig að geyma framtíðarsýn. Var skýrslan afhent á umræðufundi með fulltrúum stofnana og samtaka sem unnið hafa með verkefnisstjórn átaksins undanfarin ár að fræðslu fyrir börn, almenning og réttarvörslukerfið.

Framtíðarsýnin og næstu skref í málaflokknum voru til umræðu ásamt samstarfsyfirlýsingu um aðgerðir gegn ofbeldi sem félags- og húsnæðismálaráðherra, innanríkisráðherra og mennta- og menningarmálaráðherra undirrituðu nýlega.

Vitundarvakningin er samstarfsverkefni innanríkisráðuneytis, mennta- og menningarmálaráðuneytis og velferðarráðuneytis. Hún var stofnuð til þriggja ára í byrjun 2012 en mun starfa áfram árið 2015. Í skýrslunni eru lagðar til nokkrar leiðir um fyrirkomulag forvarna sem grundvallist á þekkingu sem fengist hefur með rannsóknum, samráði fagaðila, upplýsingaveitu og fræðslu.

• Skýrsla Vitundarvakningar 2012-2014
  
• Útdráttur úr skýrslunni
• Vefsvæði Vitundarvakningar