Hoppa yfir valmynd

Frétt

17. apríl 2015 Forsætisráðuneytið

Ríkisstjórnin samþykkti aukin framlög vegna Holuhrauns

Ríkisstjórnin samþykkti í morgun, á grundvelli tillögu samráðshóps ráðuneytisstjóra, að veita þeim stofnunum sem unnið hafa að vöktun, viðbúnaði og mælingum vegna Holuhrauns og eldsumbrotanna norðan Vatnajökuls aukin fjárframlög að upphæð 448,7 milljónir kr. árið árið 2015. Einnig var heimiluð nýting á ónýttum fjárheimildum frá árinu 2014 að fjárhæð 100,8 milljónir.  Samantekið að meðtaldri þessari ákvörðun hefur ríkisstjórnin samþykkt viðbótar fjárframlög til stofnana sem nemur 1.136 m.kr. frá því eldsumbrot hófust á síðasta ári fram til septemberloka á þessu ári.

„Það starf sem eftirlits- og viðbragðsaðilar hafa unnið til þessa hefur verið sérlega farsælt. Þó að mesta hættan virðist liðin hjá er nauðsynlegt að standa vaktina áfram og tryggja fyllsta öryggi á svæðinu sérstaklega yfir ferðamannatímann. Einnig er mikilvægt að efla það vísindastarf sem náttúruhamfarir sem þessar kalla á,“ sagði Sigmundur Davíð Gunnlaugsson, forsætisráðherra.

Á ríkisstjórnarfundi þann 10. september 2014 samþykkti ríkisstjórnin að skipa samráðshóp ráðuneytisstjóra um viðbrögð við náttúruvá, undir forystu forsætisráðuneytisins, og var honum falið að yfirfara fjárþörf og kostnað vegna hamfaranna og hafa yfirsýn yfir viðbrögð, aðgerðir og samhæfingu. Hópurinn hefur fundað reglulega og lagt mat á viðbótarfjárheimildir til stofnana sem koma helst að málum. Byggt á tillögum hópsins samþykkti ríkisstjórnin á fundi sínum þann 4. nóvember 2014 að veita samtals 687 m. kr. af óráðstöfuðum fjárheimildum til þessara verkefna vegna áætlaðs kostnaðar stofnana umfram fjárheimildir þeirra  út árið 2014.

Þó að eldgosinu í Holuhrauni sé nú lokið telur hópurinn þörf á að halda hluta af sértækum aðgerðum vegna umbrotanna áfram og vöktun og eftirliti umfram það sem telst hluti af daglegum rekstri og verkefnum stofnana. Þá er mikilvægt að mælingum verðisinnt áfram og að frekari hreyfingar á svæðinu verði vaktaðarmeð tilliti til hugsanlegra frekari hamfara. Vegna óvissu um framvindu telja vísindamenn og viðbragðsaðilar nauðsynlegt að halda úti slíkri vöktun og auknu eftirliti t.d. vegna ferðamanna á svæðinu, auk öflun upplýsinga og gerð rannókna á náttúrufar, vatnasvæði, lífríki og heilsufar þannig að hægt verði að grípa til aðgerða til að draga úr áhrifum.

Hafa samband

Ábending / fyrirspurn
Ruslvörn
Vinsamlegast svaraðu í tölustöfum