Sigmundur Davíð Gunnlaugsson, forsætisráðherra, sækir leiðtogafund 11. og 12. nóvember í Valletta á Möltu þar sem fjallað verður um fólksflutninga og flóttamannavandann (Valletta Summit on Migration).

Leiðtogafundurinn mun í aðalatriðum fjalla um heildstæða nálgun gagnvart þeim áskorunum sem fólksflutningavandinn skapar, en ljóst þykir að samvinna ríkja er nauðsynleg til að takast á við hann.

Um er að ræða fund Evrópuríkja, Afríkuríkja, ýmissa alþjóðastofnana og svæðisbundinna stofnana. Leiðtogum um 70 ríkja er boðin þátttaka ásamt háttsettum aðilum ýmissa stofnana og samtaka.