Í ljósi aukinnar áherslu á baráttu gegn mútum í alþjóðlegum viðskiptum hafa innanríkisráðuneyti og utanríkisráðuneyti haft samvinnu um að senda upplýsingablað um erlend mútubrot til sendiráða Íslands og sendiskrifstofa. Er þar vakin athygli á samningi OECD um baráttu gegn mútugreiðslum til erlendra opinberra starfsmanna og er Ísland aðili að þeim samningi. Þar er undirstrikað að mútur grafi undan góðum stjórnarháttum og efnahagsþróun auk þess að skekkja samkeppnisstöðu fyrirtækja.

Íslensk stjórnvöld leggja áherslu á að fylgja eftir ákvæðum alþjóðasamninga en það er einnig hagur fyrirtækja og einstaklinga að fá vitneskju um gildandi lög, hvernig þau geta sinnt mikilvægri upplýsingaskyldu og almennt stundað góða viðskiptahætti. Fulltrúar fyrirtækja eða aðrir sem verða varir við mútubrot erlendis geta upplýst sendiskrifstofur Íslands um málið og einnig haft samband við lögreglu hér á landi. Ábendingum eða fyrirspurnum ber að beina til embættis héraðssaksóknara sem fer með rannsókn á efnahagsbrotum.

• Upplýsingablað um mútubrot