Sigmundur Davíð Gunnlaugsson, forsætisráðherra, hefur þegið boð Barack Obama, forseta Bandaríkjanna, um að sækja leiðtogafund Norðurlandanna og Bandaríkjanna, sem haldinn verður í Hvíta Húsinu í Washington 13. maí 2016. Um er að ræða opinbera heimsókn leiðtoga Norðurlandanna með viðhafnarkvöldverði þeim til heiðurs.

Þessi viðburður fylgir í kjölfar fundar leiðtoga Norðurlandanna og Bandaríkjanna sem haldinn var í Svíþjóð árið 2013, en þá bauð þáverandi forsætisráðherra Svíþjóðar til fundarins í tilefni af tvíhliða heimsókn forseta Bandaríkjanna til Svíþjóðar.

Leiðtogarnir munu á fundi sínum ræða áframhaldandi samvinnu Bandaríkjanna og Norðurlandanna á ýmsum sviðum alþjóða- og utanríkismála. Leiðtogarnir munu meðal annars ræða baráttu gegn hryðjuverkum og aðgerðir gegn ofbeldisfullri öfgahyggju, alþjóðlegt heilbrigðisöryggi, umhverfismál, samstarf varðandi málefni norðurslóða, öryggismál, þróunar- og mannúðarmál auk málefna flóttamanna.