Heimsókn Sigurðar Inga Jóhannssonar forsætisráðherra og annarra leiðtoga Norðurlanda í Washington DC heldur áfram
John Kerry, utanríkisráðherra Bandaríkjanna, bauð leiðtogum Norðurlandanna og sendinefndum til hádegisverðar í gær, að loknum fundi leiðtoganna með Barack Obama sem haldinn var um morguninn.
Allir leiðtogar Norðurlanda fluttu ávörp. Í ávarpi sínu lagði Sigurður Ingi, forsætisráðherra áherslu á vináttu og farsælt samstarf Íslands og Bandaríkjanna. Þá gerði hann samstarf þjóðanna í málefnum hafsins að umtalsefni og sjálfbæra stjórnun sjávarauðlinda þar sem Ísland er í fararbroddi.
Í gærkvöld buðu svo forsetahjón Bandaríkjanna leiðtogum Norðurlandanna, sendinefndum og fleiri gestum til kvöldverðar í Hvíta húsinu. Þar flutti forsætisráðherra skálaræðu, þakkaði hlýjar móttökur og færði gestgjöfum kveðju frá íslensku þjóðinni. Hann fjallaði um sameiginleg gildi þjóðanna, – virðingu fyrir frelsi, lýðræði, mannréttindum og réttarríkinu. Þá störfuðu ríkin meðal annars sameiginlega að framgangi jafnréttismála og valdeflingu kvenna. Þá hrósaði Sigurður Ingi forseta Bandaríkjanna fyrir forystu í loftlagsmálum og málefnum norðurslóða.
Leiðtogar Norðurlandanna lögðu blómsveig við minnisvarða óþekkta hermannsins við athöfn í Arlington kirkjugarði í morgun.
Forsætisráðherra heldur heim á leið síðdegis í dag.