Borgaraþjónusta utanríkisráðuneytisins hefur fylgst grannt með gangi mála í Tyrklandi í nótt og það sem af er degi. Ljóst er að nokkur fjöldi Íslendinga er í landinu, langflestir á sumarleyfissvæði við suðurströndina. Við erum í góðu sambandi við ræðismenn okkar í Tyrklandi og höfum talað við fjölda Íslendinga á svæðinu.

Á samráðsfundi Norðurlandanna um borgaraþjónustu í morgun var ákveðið að vara áfram við ónauðsynlegum ferðum til Tyrklands. Við leiðbeinum fólki áfram að gæta ítrustu varúðar og fylgjast vel með ástandi mála. Annar samráðsfundur verður haldinn í fyrramálið og verða ferðaviðvaranir uppfærðar eftir því sem við á.