Sérfræðingahópur um stöðuleikasjóð skipaður
Í stjórnarsátttmála ríkisstjórnarinnar er kveðið á um
stofnun stöðugleikasjóðs sem haldi utan um arð af orkuauðlindum í eigu
ríkissjóðs, tryggi komandi kynslóðum hlutdeild í ávinningi af sameiginlegum
auðlindum og geti verið sveiflujafnandi fyrir efnahagslífið.
Í samræmi við þetta hefur forsætisráðherra skipað
sérfræðingahóp um stofnun slíks stöðugleikasjóðs.
Bjarni Benediktsson forsætisráðherra segir ánægjulegt að nú
skuli þessi vinna vera formlega hafin. „Við sjáum fyrir okkur að markmið
stöðugleikasjóðs verði að byggja upp viðnám til að mæta fjárhagslegum áföllum
án þess að það leiði til skuldasöfnunar eða ójafnvægis í hagkerfinu eins og við
þekkjum svo vel úr sögunni. Markmiðin lúta því einkum að sveiflujöfnun,
varúðarsjónarmiðum og sjálfbærni opinberra fjármála. Horft er til þess að hlutverk
slíks stöðugleikasjóðs yrði að byggja upp þjóðhagslegan sparnað með því að taka
við og ávaxta fjárhagslegar eignir ríkissjóðs sem til hans eru lagðar og að
ráðstafa fjármunum til ríkissjóðs í samræmi við ákvæði laga,“ sagði Bjarni
Benediktsson forsætisráðherra.
Gert er ráð fyrir að fjármögnun stöðugleikasjóðs verði með
þeim hætti að til hans verði ráðstafað fjárhagslegum arði ríkisins af
orkuauðlindum, eftir atvikum í formi afnotagjalda, arðgreiðslna orkufyrirtækja,
verðbréfa tengd orkufyrirtækjunum eða í öðru formi. Þá þarf að meta hvort til
sjóðsins yrði lagðar aðrar fjárhagslegar eignir, svo sem fjármunir sem
varðveittir eru í gjaldeyrisvaraforða Seðlabanka Íslands samkvæmt sérstöku
samkomulagi við bankann.
Sérfræðingahópurinn er þannig skipaður:
- Ingimundur Friðriksson, hagfræðingur
- Kristín Haraldsdóttir, lögfræðingur
- Erlendur Magnússon, fjárfestir.