Guðlaugur Þór Þórðarson, utanríkisráðherra, gerði í morgun stöðu Íslands innan Atlantshafsbandalagsins og öryggismál á norðanverðu Atlantshafi að umtalsefni í ávarpi á öryggismálaráðstefnu, sem haldin er á Grand Hotel í Reykjavík á vegum Atlantshafsbandalagsins. Einnig fjallaði ráðherra um aukin framlög Íslands til öryggis- og varnarmála, en ráðstefnuna sækja um 150 manns frá aðildarríkjum Atlantshafsbandalagsins og stofnunum þess. Meðal ræðumanna var Rose Gottemoeller, varaframkvæmdastjóri Atlantshafsbandalagsins, sem einnig átti tvíhliða fund með Guðlaugi Þór.

"Það er mikilvægt að fulltrúar frá aðildarríkjum bandalagsins komi hingað til lands og kynnist aðstæðum, meðal annars á öryggissvæðinu á Keflavíkurflugvelli, og því mikilvæga framlagi sem Ísland innir af hendi í nafni sameiginlegra varna Atlantshafsbandalagsins. " segir Guðlaugur Þór.