Hoppa yfir valmynd

Frétt

6. nóvember 2019 Heilbrigðisráðuneytið

Fjallað um framhaldsmenntun lækna og mönnun til framtíðar

Fjallað um framhaldsmenntun lækna og mönnun til framtíðar - myndHeilbrigðisráðuneytið /ME

Heilbrigðisráðherra hefur skipað starfshóp sem kanna á stöðu framhaldsmenntunar lækna hér á landi og koma með tillögur að því hvernig tryggja megi nægilegt framboð lækna með framhaldsmenntun svo unnt sé að manna íslenska heilbrigðiskerfið til framtíðar. Hópurinn sem skipaður var 17. október sl. á að skila ráðherra tillögum sínum fyrir 10. janúar næstkomandi.

Hópnum er ætlað að huga sérstaklega að framhaldsmenntun heilsugæslulækna og til hvaða aðgerða þurfi að grípa til að tryggja mönnun á heilsugæslustöðvum út um land. Einnig á hann að skoða hvernig halda megi áfram uppbyggingu sérnáms lækna hér á landi. Mikilvægt er að koma á skipulegu samstarfi við önnur lönd um framhaldsmenntun lækna. Leggja þarf áherslu á að framhaldsnám sem stundað hefur verið hér á landi sé viðurkennt af hálfu heilbrigðisyfirvalda í þeim löndum þar sem viðkomandi læknar ljúka formlegu framhaldsnámi sínu. Í starfi sínu skal hópurinn hafa Heilbrigðisstefnu til ársins 2030 til hliðsjónar.

Runólfur Pálsson læknir er formaður starfshópsins. Aðrir nefndarmenn eru:

  • Tómas Þór Ágústsson, tilnefndur af Landspítala
  • Sigurður E. Sigurðsson, tilnefndur af Sjúkrahúsinu á Akureyri
  • Elínborg Bárðardóttir, tilnefnd af Heilsugæslu höfuðborgarsvæðisins
  • Salóme Ásta Arnardóttir, tilnefnd af Læknafélagi Íslands
  • Þórdís Jóna Hrafnkelsdóttir, tilnefnd af Heilbrigðisvísindasviði Háskóla Íslands
  • Guðrún Ása Björnsdóttir, formaður Félags almennra lækna, án tilnefningar.

Starfsmaður hópsins er Ingibjörg Björnsdóttir, sérfræðingur í heilbrigðisráðuneytinu.

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum