Menntamálaráðherrar Íslands og Svíþjóðar funda: Starfsþróun kennara og skýr námskrá skipta mestu
.jpg)
„Svíar lögðu megináherslu á tvennt. Annars vegar skýra aðalnámskrá sem tryggir gæði í skólastarfi. Í því samhengi er mikilvægt að menntamálayfirvöld tryggi að skólasamfélagið fái faglegan stuðning til að fylgja henni eftir sem og að foreldrar nemenda hafi þekkingu á námskránni. Hins vegar gerðu Svíar stórátak í markvissri starfsþróun kennara sem skilað hefur miklum árangri. Anna Ekström veitti okkur gagnlega innsýn í uppbyggingu menntakerfisins og hvað raunverulega skipti máli þegar kom að því að styrkja nemendur í lestri, stærðfræði og náttúruvísindum. Íslensk stjórnvöld hafa mikinn metnað í menntamálum enda er gæðamenntun lykillinn að velsæld framtíðarinnar,“ segir Lilja Alfreðsdóttir mennta- og menningarmálaráðherra.
Í kjölfar birtingar niðurstaðna PISA könnunarprófanna í desember sl. kynnti ráðherra aðgerðir sem miða að því að efla læsi og bæta orðaforða og málskilning íslenskra nemenda. Þær felast meðal annars í að:
• Efla starfsþróun kennara.
• Fjölga kennurum með sérhæfða þekkingu.
• Endurskoða námsefni og fyrirkomulag námsefnisgerðar.
• Stórauka áherslu á orðaforða í öllum námsgreinum.
• Fjölga kennslustundum í íslensku og endurskoða inntak íslenskukennslu.
• Stofna fagráð í læsi, stærðfræði og náttúruvísindum.
• Efla menntarannsóknir.
• Auka væntingar til nemenda.
• Auka samstarf allra hagsmunaaðila.
Unnið verður að útfærslu aðgerða er að þessu miða í góðu samstarfi, meðal annars við skólasamfélagið og sveitarfélögin.
Efnisorð
Heimsmarkmiðin
