Íslenskt menntakerfi sækir fram
„Þetta var gagnleg ferð í mörgu tilliti og mikilvæg þeirri vinnu sem nú stendur yfir vegna nýrrar menntastefnu. Með í för var fagfólk sem hefur víðtæka þekkingu og reynslu á ólíkum sviðum menntamála, og við fengum greinargóðar og nytsamlegar upplýsingar og ákveðinn innblástur í þessari ferð. Ég hef trú á því að með góðu samstarfi og viljann að vopni munum við ná miklum árangri með íslenskt menntakerfi,“ sagði Lilja Alfreðsdóttir mennta- og menningarmálaráðherra.
Í heimsókninni fundaði ráðherra með Önnu Ekström menntamálaráðherra Svíþjóðar og Roger Haddad varaformanni menntamálanefndar sænska þingsins. Meðal annarra viðkomustaða hópsins voru menntamálastofnun Svía (s. Skolverket), skólaeftirlitsstofnun þeirra (s. Skolinspektionen) og skóla- og menntasvið Stokkhólms. Þá fór hópurinn einnig í heimsókn í Oxhagsskóla sem hefur vakið athygli fyrir góðan árangur en 98% nemenda þar hafa sænsku sem annað móðurmál, þar er lögð mikil áhersla á lestur og að fá til sín hæfa og reynda kennara.