Heilbrigðisráðherra hefur lagt Heilsugæslu höfuðborgarsvæðisins (HH) til 23 milljóna króna fjárveitingu til að fjölga sérnámsstöðum í geðlækningum. Þetta gerir kleift að fjármagna stöður tveggja sérnámslækna við geðheilsuteymi heilsugæslunnar. Undanfarin tvö ár hefur rík áhersla verið lögð á að efla annars stigs geðheilbrigðisþjónustu, meðal annars með stofnun geðheilsuteyma í öllum heilbrigðisumdæmum landsins, sérstöku geðheilsuteymi fanga og geðheilsuteymi í fjölskylduvernd sem starfar á landsvísu líkt og geðheilsuteymi fanga, undir stjórn HH.

Yfirlæknar geðheilsuteyma Heilsugæslu höfuðborgarsvæðisins hafa undanfarið átt í samræðum við umsjónarmenn sérnáms í geðlækningum á Landspítala. Þar hefur verið samhljómur um mikilvægi þess að sérnámslæknar öðlist reynslu í samfélagsgeðlækningum líkt og stunduð er í geðheilsuteymum HH. Fyrsti sérnámslæknirinn er þegar tekinn til starfa í geðheilsuteymi HH austur og reiknað er með að annar sérnámslæknir hefji störf við geðheilsuteymi HH vestur í byrjun næsta árs. Með aukinni fjárveitingu hefur fjármögnun þessara stöðugilda verið tryggð.

Svandís Svavarsdóttir heilbrigðisráðherra segir ánægjulegt að sjá annars stigs geðheilbrigðisþjónustu eflast innan opinbera heilbrigðiskerfisins í samræmi við markmið heilbrigðisstefnu. „Þetta er mikilvæg þjónusta sem þarf að auka og enn fremur að jafna aðgengi fólks að henni um allt land, líkt og gert er með geðheilsuteymunum.“

• Geðheilsuteymi fjölskylduvernd
• Geðheilsuteymi fanga
• Geðheilsuteymi á starfssvæði HH