Hoppa yfir valmynd
02. nóvember 2015 Fjármála- og efnahagsráðuneytið

Fjármálastöðugleikaráð - fundargerð frá 2. október 2015

Fundargerð fjármálastöðugleikaráðs 2. október 2015.

Fundur haldinn í fjármála- og efnahagsráðuneyti.

Ráðsmenn: Bjarni Benediktsson, fjármála- og efnahagsráðherra, formaður, Már Guðmundsson, seðlabankastjóri, Unnur Gunnarsdóttir, forstjóri Fjármálaeftirlitsins.

Aðrir fundarmenn: Guðmundur Árnason, ráðuneytisstjóri í fjármála- og efnahagsráðuneyti, Anna Borgþórsdóttir, staðgengill skrifstofustjóra skrifstofu efnahagsmála og fjármálamarkaðar í fjármála- og efnahagsráðuneyti, Harpa Jónsdóttir, aðstoðarframkvæmdastjóri fjármálastöðugleika í Seðlabankanum, Jón Þór Sturluson, aðstoðarforstjóri Fjármálaeftirlitsins og Tinna Finnbogadóttir, ritari fjármálastöðugleikaráðs.

Fundur hefst 13:35

1. Greinargerð kerfisáhættunefndar

Formaður kerfisáhættunefndar kynnti greinargerð hennar til fjármálastöðugleikaráðs og fjallaði um áhættu í fjármálakerfinu og hvernig hún hefur breyst frá síðasta fundi ráðsins í vor. Til skemmri tíma er breytingin lítil en sé horft lengra fram á veginn hefur áhættan fyrir fjármálakerfið vaxið þar sem líkur á þjóðhagslegu ójafnvægi hafi aukist. Viðnámsþróttur bankanna til að standast áföll er talinn góður enda eiginfjárhlutföll há og lausafjárstaða góð. Hagnaður stóru bankanna á fyrri árshelmingi var umtalsverður en hann mátti að miklu leyti rekja til einskiptisliða. Uppgjör búa föllnu bankanna og gjaldeyrisútboð vegna aflandskróna geta haft einhver neikvæð áhrif á lausafjárstöðu bankanna en þau eiga að vera innan viðráðanlegra marka. Þá þarf að ljúka undirbúningi varúðarreglna vegna áhættu sem fylgir fjármagnshreyfingum til og frá landinu nú þegar hillir undir losun fjármagnshafta.

2. Eiginfjáraukar

Fjallað um lagaheimildir Fjármálaeftirlitsins til að kveða á um eiginfjárauka á fjármálafyrirtæki sem taka gildi um áramót sbr. lög nr. 161/2002. Farið yfir við hvaða aðstæður rétt væri að setja þá á og hvernig þær aðstæður væru metnar. Upplýsingaskyldur gagnvart mörkuðum og evrópskum eftirlitsstofnunum voru ræddar og hvernig eiginfjáraukum væri hagað í nágrannalöndum.

3. Staðfesting kerfislega mikilvægra aðila.

Kerfisáhættunefnd lagði fyrir fjármálastöðugleikaráð að staðfesta skilgreiningu á kerfislega mikilvægum innviðum sbr. d-lið 2.mgr. 4.gr. laga nr. 66/2014 um fjármálastöðugleikaráð. Lagt var til að þrjú kerfi teldust kerfislega mikilvægir innviðir þ.e. stórgreiðslukerfi Seðlabanka Íslands, jöfnunarkerfi Greiðsluveitunnar ehf. og verðbréfauppgjörskerfi Nasdaq verðbréfamiðstöðvar hf. Tillagan byggist á umsvifum og þýðingu þessara þriggja kerfa í íslenskum fjármálainnviðum og alþjóðlegum leiðbeiningum sem um þau gilda, Principles for Financial Market Infrastructure (PFMI). Fjármálastöðuleikaráð staðfesti að fyrrnefnd þrjú kerfi yrðu skilgreind kerfislega mikilvægir innviðir.

4. Útlán til heimila og fyrirtækja

Farið yfir greiningar á skuldum heimila og fyrirtækja. Merkja má að skuldir heimila séu að dragast saman - veðhlutföll hafa batnað, vanskil minnkað og skuldahlutföll íslenskra heimila eru heilt á litið góð í alþjóðlegum samanburði. Nettóeign einstaklinga eftir aldri hefur batnað fyrir langflesta aldurshópa sem stafar fyrst og fremst af aðgerðum ríkisstjórnarinnar til lækkunar skulda. Skuldir fyrirtækja fara almennt lækkandi sem hlutfall af landsframleiðslu en hrein ný útlán hafa vaxið samfellt frá þriðja ársfjórðungi síðasta árs. Vanskil fyrirtækja hafa þróast í svipaða átt og hjá einstaklingum.

5. Fjármagnsflæði

Seðlabankastjóri fjallaði um það erlenda fjármagn sem streymt hefur til landsins frá í sumar og hvernig bankinn hefur brugðist við því. Þá gerði hann grein fyrir þeirri vinnu sem er í gangi við að fylgja eftir ráðleggingum bankans sem fram komu í skýrslu hans Varúðarreglur eftir fjármagnshöft um hvernig hafa mætti áhrif á flæði fjármagns til og frá landinu.

6. Önnur mál:

Fréttatilkynning samþykkt með breytingum.

Fundi slitið 14:50

Efnisorð

Var efnið hjálplegt?
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn
Ruslvörn
Vinsamlegast svaraðu í tölustöfum