Sveitarstjórnir

Sveitarstjórn hvers sveitarfélags sér um gerð kjörskrár, kosningu undirkjörstjórna og sérstakra kjörstjórna og skiptingu sveitarfélags í kjördeildir.

Kjördeildir

Skipting sveitarfélags
Hverju kjördæmi skal skipt í kjördeildir og er hvert sveitarfélag ein kjördeild nema sveitarstjórn ákveði að skipta því í fleiri kjördeildir. Kjördeildir skal að jafnaði kenna við kjörstað eða tölusetja til aðgreiningar.

Kjörstjórnir

Kosning undirkjörstjórna og sérstakra kjörstjórna
Sveitarstjórn kýs undirkjörstjórn í hverja kjördeild, þrjá aðalmenn og þrjá til vara. Einnig geta sveitarstjórnir kosið sérstakar kjörstjórnir.

• Nánar um undirkjörstjórnir
• Nánar um sérstakar kjörstjórnir

Kjörskrár

Gerð kjörskrár
Sveitarstjórnir gera kjörskrár á grundvelli kjörskrárstofna frá Þjóðskrá Íslands. Aðeins þeir sem eru á kjörskrá þegar kosning fer fram geta neytt kosningaréttar. Kjörskrá skal lögð fram almenningi til sýnis eigi síðar en tíu dögum fyrir kjördag, miðvikudaginn 17. júní 2020.

Hverjir eru teknir inn á kjörskrá?
Þeir íbúar sveitarfélags sem uppfylla öll kosningaréttarskilyrði á viðmiðunardegi kjörskrár sem er þremur vikum fyrir kjördag, 6. júní 2020.

• Sjá nánar um kosningarrétt og gerð kjörskrár

Framlagning kjörskrár

Þegar kjörskrá hefur verið samin skal hún undirrituð af oddvita sveitarstjórnar eða framkvæmdastjóra sveitarfélags. Kjörskrá skal liggja frammi almenningi til sýnis í minnst tíu daga fyrir kjördag, frá 17. júní 2020. Algengast er að hún liggi frammi á skrifstofum sveitarfélaganna á almennum skrifstofutíma og er sveitarstjórn falið að auglýsa framlagningarstað.

Athugasemdir við kjörskrá

Hver sem er getur gert athugasemdir til sveitarstjórnar um að nafn eða nöfn einhverra kjósenda vanti á kjörskrá eða þeim sé þar ofaukið. Heimilt er að gera slíkar athugasemdir til sveitarstjórnar fram á kjördag.

Sveitarstjórn skal þegar taka til meðferðar athugasemdir er henni berast vegna kjörskrár og gera viðeigandi leiðréttingar á henni. Viðkomandi skal þá veittur frestur, eftir atvikum, til að koma athugasemdum á framfæri. Ef til ágreinings kemur ritar sveitarstjórn úrskurð í gerðabók sína.Tilefni slíkra leiðréttinga er einkum öflun eða missir íslensks ríkisfangs eða andlát á tímabilinu frá viðmiðunardegi kjörskrár til kjördags. Slíkar leiðréttingar má gera fram á kjördag.

Óheimilt er að breyta kjörskrá vegna breytts lögheimilis hafi tilkynning um nýtt lögheimili ekki borist Þjóðskrá Íslands fyrir viðmiðunardag kjörskrár, 6. júní 2020.

• Sjá nánar um kosningarrétt og gerð kjörskrár

Kjörstaðir

Ákvörðun kjörstaðar
Sveitarfélög auglýsa kjörstaði við forsetakosningarnar 27. júní. Mörg þeirra birta einnig kjörfundarupplýsingar á vefjum sínum. Kjörstaðir eru almennt opnir frá kl. 9 árdegis til kl. 22 að kvöldi. Þó geta kjörstjórnir ákveðið að byrja síðar og hætta fyrr. Dómsmálaráðuneytið hefur safnað saman upplýsingum um kjörstaði og tengt í slíkar upplýsingar á vefsíðum sveitarfélaga eftir því sem þær hafa borist.