Fjarskipti

Stefna í fjarskiptamálum er mörkuð í fjarskiptaáætlun. Þar eru markmið stjórnvalda skilgreind og lagður grunnur að framþróun íslensks samfélags. Í fjarskiptaáætlun segir að stuðla skuli að aðgengilegum og greiðum, hagkvæmum og skilvirkum, öruggum og umhverfisvænum fjarskiptum. 

Íslensk fjarskiptalöggjöf er að miklu leyti byggð á löggjöf Evrópusambandsins á sviði fjarskipta vegna skuldbindinga Íslands í samræmi við samninginn um Evrópska efnahagssvæðið. Umsjón með framkvæmd og eftirlit með lögum um fjarskipti er í höndum Póst- og fjarskiptastofnunar.

Fjarskiptasjóður hefur það hlutverk að stuðla að uppbyggingu fjarskiptamála á grundvelli fjarskiptaáætlunar, en sjóðurinn heyrir undir samgöngu- og sveitarstjórnarráðuneytið.

Telji neytendur fjarskiptaþjónustu eða aðrir sem hagsmuna hafa að gæta að fjarskiptafyrirtæki brjóti gegn skyldum sínum samkvæmt lögum um fjarskipti eða gegn skilyrðum sem mælt er fyrir um í almennum heimildum, réttindum eða í rekstrarleyfi getur hlutaðeigandi beint kvörtun til Póst- og fjarskiptastofnunar um að hún láti málið til sín taka. Þá greiðir stofnunin jafnframt úr deilum á milli fyrirtækja á fjarskiptamarkaði.

Ákvarðanir Póst- og fjarskiptastofnunar eru kæranlegar til úrskurðarnefndar fjarskipta- og póstmála. Einnig geta aðilar borið ákvarðanir Póst- og fjarskiptastofnunar og úrskurði úrskurðarnefndar fjarskipta- og póstmála undir dómstóla.