Póstþjónusta

Póstþjónustan hefur tekið miklum breytingum á síðustu árum og með stórauknum rafrænum samskiptum fækkar stöðugt bréfum sem bera þarf út til viðtakenda. Frá árinu 2013 hefur orðið mikill vöxtur í netverslun með tilsvarandi aukningu pakkasendinga bæði innanlands og frá erlendum ríkjum.

Ný heildarlög um póstþjónustu taka gildi 1. janúar 2020, sjá hér á vef Alþingis. Þá verður afnuminn einkaréttur Íslandspósts ohf. á dreifingu áritaðra bréfa undir 50 g. Markmið þessara laga er að stuðla að hagkvæmri, virkri og áreiðanlegri póstþjónustu um land allt og til og frá landinu, m.a. með því að tryggja notendum aðgang að alþjónustu eins og hún er skilgreind á hverjum tíma og með því að efla samkeppni á markaði fyrir póstþjónustu.

Þann 15. júní 2019 tóku gildi lög um breytingar á ákvæðum gildandi póstlaga nr. 19/2002 sem fela m.a. í sér að heimila Íslandspósti ohf. að setja gjaldskrá fyrir erlendar póstsendingar sem á að mæta raunkostnaði við sendingarnar.