Vegakerfið

Traust vegakerfi og góðar samgöngur eru forsenda þess að mannlíf og atvinnulíf geti vaxið og dafnað í þéttbýli sem dreifbýli. Samkvæmt vegalögum er vegakerfi landsins skipt upp í þjóðvegi, sveitarfélagsvegi, almenna stíga og einkavegi, þar sem þjóðvegir og sveitarfélagsvegir skulu mynda eðlilegt og samfellt vegakerfi til tengingar byggða landsins.

Vegagerðin sér um framkvæmdir við uppbyggingu, viðhald og þjónustu á vegakerfinu. Hlutverk stofnunarinnar er að sjá samfélaginu fyrir vegakerfi í samræmi við þarfir og þróun og tryggja samgöngur árið um kring með eins hagkvæmum og öruggum hætti og unnt er.

Vegagerðin annast hönnun og gerð samgöngumannvirkja og sinnir þeim verkefnum í samræmi við stefnumarkandi samgönguáætlun og fjárveitingar hvers árs. Framkvæmdir á vegakerfinu skipast í viðhald og nýframkvæmdir. Samgöngustofa annast svo eftirlit með framkvæmd umferðaröryggisstjórnunar vegamannvirkja og setur verklagsreglur um framkvæmd eftirlitsins.

Samgönguáætlun 2020-2034

Starfsemi Vegagerðarinnar skiptist í miðstöð og fjögur svæði. Í miðstöð fer fram vinna við stefnumótun fyrir stofnunina og stjórnun hennar í heild. Svæði Vegagerðarinnar eru Suðursvæði, Vestursvæði, Norðursvæði og Austursvæði. Hvert svæði um sig annast framkvæmdir, viðhald og rekstur vegakerfisins og sér um að veita vegfarendum þjónustu innan svæðisins.

Svæðaskipting Vegagerðarinnar

Vegakerfið er flokkað eftir tegund vega og skiptist í stofnvegi, stofnvegi um hálendi, tengivegi, landsvegi og héraðsvegi, sjá kort á vef Vegagerðarinnar.

Þá sinnir Vegagerðin margs konar rannsóknarstarfi en í vegalögum er kveðið á um að 1,5% af mörkuðum tekjum til vegamála skuli renna til rannsókna- og þróunarstarfs.