Skipulag

Mikil vinna hefur þegar átt sér stað við undirbúning fyrir útgöngu Bretlands úr ESB og forgangsröðun vegna framtíðarviðræðna. Í ársbyrjun 2017 var skipaður Brexit-stýrihópur utanríkisráðuneytisins, sem og fimm vinnuhópar til að skilgreina markmið Íslands fyrir framtíðarviðræður við Bretland. Í nóvember 2017 var birt viðamikil skýrsla sem byggði á þessu starfi og greindi hagsmuni Íslands við útgöngu Breta úr EES samhliða útgöngu þeirra úr ESB. Þá hafa vinnuhóparnir haldið áfram greiningarvinnu sinni sem miðar að því að skila helstu markmiðum og forgangsröðun samningsatriða þegar kemur að fyrirkomulagi framtíðarsambands Íslands og Bretlands. Hafa vinnuhóparnir átt samráð við fulltrúa ólíkra atvinnugreina við að kortleggja stöðuna og skilgreina markmið Íslands. Einnig þarf sífellt að endurmeta markmið Íslands í ljósi framvindu viðræðna á milli Bretlands og ESB. Ef marka má drög að útgöngusamningi ESB og Bretlands um lok fyrirhugaðs aðlögunartímabils þyrfti nýr fríverslunarsamningur milli Íslands og Bretlands að geta tekið gildi í 1. janúar 2021 til að tryggja að ekkert lagalegt tómarúm myndist. Þó er möguleiki á að aðlögunartímabilið verði framlengt ef útgöngusamningur nær fram að ganga.

Í byrjun árs 2020 skipaði utanríkisráðherra sérstaka samninganefnd til að leiða viðræðurnar af Íslands hálfu. Við skilgreiningu á og útfærslu samningsmarkmiða mun samninganefndin draga á sérfræðiþekkingu og stuðning framangreindra vinnuhópa. Hún mun og hafa náið samráð við hagsmunaaðila og utanríkismálanefnd Alþingis.

Samninganefnd

Þórir Ibsen, sendiherra, aðalsamningamaður og formaður samninganefndarinnar

Jóhanna Jónsdóttir, verkefnisstjóri og varaformaður samninganefndarinnar

Ingólfur Friðriksson, sendiráðunautur, leiðir viðræður um vöruviðskipti

Þórður Jónsson, sendiráðunautur, leiðir viðræður um þjónustuviðskipti

Guðrún Þorleifsdóttir, skrifstofustjóri í fjármálaráðuneytinu, leiðir viðræður um fjármálaþjónustu

Jóhanna Bryndís Bjarnadóttir, sendifulltrúi, leiðir viðræður um málefni er varða réttindi borgara

Þórður B. Guðjónsson, sendifulltrúi, leiðir viðræður um aðra málaflokka er lúta að framtíðarsamstarfi ríkjanna

Jafnframt starfa með nefndinni Benedikt Árnason, skrifstofustjóri í forsætisráðuneytinu, Ögmundur Hrafn Magnússon, starfsmaður viðskiptaskrifstofu og Gautur Sturluson fulltrúi úr lagateymi utanríkisráðuneytisins.

Vinnuhópar