Hoppa yfir valmynd

Uppbyggingarsjóður EES

Markmið Uppbyggingarsjóðs EES er að draga úr félagslegu- og efnahagslegu misræmi innan evrópska efnahagssvæðisins og efla tvíhliða samstarf milli EES/EFTA-ríkjanna og viðtökuríkjanna fimmtán.

EFTA-ríkin fjármagna í gegnum sjóðinn ýmsar umbætur og uppbyggingu í þeim aðildarríkjum ESB sem lakar standa í efnahagslegu tilliti. Styrkþegaríki sjóðsins eru öll í Suður- og Austur-Evrópu. Með þátttöku í Uppbyggingarsjóðnum er lögð áhersla á að skapa tækifæri fyrir íslenskar stofnanir, fyrirtæki og frjáls félagasamtök til samstarfs í viðtökuríkjunum og auka samskipti milli einstaklinga á Íslandi og í þessum ríkjum. Einnig er unnið markvisst að tvíhliða samskiptum stjórnvalda við lykilsamstarfsríki. Áhersla er lögð á aðhald í rekstri sjóðsins, ásamt því að verkefni sem unnin eru innan ramma sjóðsins taki mið af íslenskum gildum.

Samningur við ESB um nýtt starfstímabil Uppbyggingarsjóðs EES fyrir tímabilið 2014-2021 (framkvæmdatími til 2024) var undirritaður 3. maí 2016. Samningurinn kveður á um að heildarframlag EES/EFTA ríkjanna fyrir tímabilið skuli nema 1.584,1 milljónum evra en Ísland stendur að jafnaði straum af um 3-4% af heildarframlagi ríkjanna. Viðtökuríkin gera sjálf tillögur um hvaða málaflokkum þau vilja starfa að í samstarfi við EES-/EFTA-ríkin. Samningaviðræðum við viðtökuríkin um skiptingu sjóðsins eftir málaflokkum er að ljúka og hafa samningar verið undirritaðir við 12 ríki af 15.

Styrkþegaríki Uppbyggingarsjóðs EES eru eftirfarandi:
Búlgaría, Eistland, Grikkland, Kýpur, Lettland, Litháen, Malta, Portúgal, Pólland, Rúmenía, Slóvakía, Slóvenía, Króatía, Tékkland og Ungverjaland.

Nánari upplýsingar um Uppbyggingarsjóð EES má nálgast á vef skrifstofu sjóðsins í Brussel (Financial Mechanism Office) þar sem einnig er hægt að fylgjast með auglýsingum eftir umsóknum um þátttöku í verkefnum.

Áherslusvið Uppbyggingarsjóðs EES

Starfshópur undir forystu utanríkisráðuneytisins tók þátt í gerð svokallaðrar Blábókar um sjóðinn sem lokið var við árið 2016. Haft var víðtækt samráð við önnur ráðuneyti, stofnanir og helstu hagsmunaaðila um áherslur Íslands í samningaviðræðunum. Við mótun þeirra var tekið mið af almennum áherslum í utanríkisstefnu Íslands og haft að leiðarljósi að styrkja tvíhliða tengsl Íslands við viðtökuríkin ásamt því að efla mögulega aðkomu íslenskra aðila að áætlunum og verkefnum sem styrkt verða.

Blábókin markar rammann um áherslur og áætlanir sjóðsins á næsta tímabili.

Blábók Upbyggingarsjóðs EES 2014-2021

Þátttaka Íslands í samstarfsáætlunum styrkþegaríkja Uppbyggingarsjóðs EES

Ísland mun á komandi tímabili leggja áherslu á verkefni á sviði rannsókna, nýsköpunar, menntunar og menningar, orku- og umhverfismála, samfélagslegra umbóta og málefna flóttamanna. Samvinna á sviði jarðvarma hefur fram til þessa verið mikið áherslumál Íslendinga og mun halda áfram í þeim viðtökuríkjum þar sem kostur er. Á komandi tímabili verður aukin áhersla lögð á tvíhliða verkefni milli viðkomandi ríkja og hvers og eins EES-/EFTA-ríkis og verður um 2% af framlagi til sérhvers ríkis varið til slíkra verkefna. Með þessari nýbreytni í starfinu munu skapast einstök tækifæri til þess að efla samskipti Íslands og einstakra ríkja. Til þess að tryggja sem best aðstoð við fyrirtæki og stofnanir á Íslandi, sem hafa áhuga á að taka þátt í verkefnum á vegum sjóðsins, munu Rannís.og Orkustofnun halda áfram hlutverki sínu sem samstarfsaðilar stjórnvalda á Íslandi og í viðtökuríkjunum. Mannréttindaskrifstofa Íslands mun einnig aðstoða vegna samstarfs við frjáls félagasamtök.     

Frjáls félagasamtök

Að lágmarki 10% styrkfjár sjóðsins rennur til að byggja upp frjáls og óháð félagasamtök í styrkþegaríkjunum eða um 150 milljón evra. Gerðar eru áætlanir um ráðstöfun fjárins í hverju ríki um sig. Áherslur eru nokkuð mismunandi eftir ríkjum, en verkefnin sem styrkt eru ná yfir breitt svið, s.s. mannréttindi, jafnrétti, mansal, menningarverðmæti, umhverfisvernd, loftlagsbreytingar, velferðamál sem og þjálfun og endurmenntun.

Sérstök áhersla er lögð á tvíhliða samstarf við frjáls félagasamtök í EFTA-ríkjunum og getur sjóðurinn skapað einstakt tækifæri fyrir frjáls félagasamtök á Íslandi til að vinna að sameiginlegum verkefnum innan styrkþegaríkjanna. Auk styrkja sem renna til verkefnanna sjálfra eru veittir styrkir til tengslamyndunar og verkefnaþróunar.

Mannréttindaskrifstofa Íslands er tengiliður á Íslandi við sjóðinn og styrkþegaríkin.

Vefsetur Uppbyggingarsjóðs EES

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn


Þessi síða notar vafrakökur Lesa meira