Hoppa yfir valmynd

UN Women

Almennt 

UN Women tók formlega til starfa 1. janúar 2011, en stofnunin varð til við samruna fjögurra fjögurra stofnana sem unnu að kynjajafnréttismálum innan SÞ, þar á meðal UNIFEM. Stofnunin er í fararbroddi í baráttunni fyrir jafnrétti kynjanna og valdeflingu kvenna á heimsvísu og er eina stofnun SÞ sem vinnur eingöngu að jafnrétti kynjanna, en stofnunin hefur þríþætt hlutverk.Hún starfar á vettvangi, sinnir samræmingarhlutverki meðal stofnana SÞ og er leiðandi í stefnumótun SÞ á alþjóðavettvangi um málaflokkinn. Ísland leggur mikla áherslu á jafnrétti kynjanna á heimsvísu og ráðuneytið telur í því samhengi mikilvægt að styðja við þessa áherslustofnun. Ísland var fjórða stærsta gjafaríki stofnunarinnar árið 2015 þegar kjarnaframlögin voru skoðuð miðað við höfðatölu, en framlög Íslands til UN Women jukust um helming frá stofnun þess árið 2011 til ársins 2016.

Efst á baugi

Utanríkisráðherra undirritaði í febrúar sl. rammasamning við UN Women, en samningurinn veitir heildræna umgjörð utan um samstarf Íslands og stofnunarinnar. Ísland hefur veitt framlög til stofnunarinnar frá því að hún var sett á laggirnar árið 2011. Á undanförnum árum hefur Ísland lagt áherslu á að auka vægi kjarnaframlaga sem svar við beiðni UN Women um að gjafaríki dragi úr eyrnamerkingum framlaga en með því getur stofnunin brugðist hraðar við breyttum aðstæðum og forgangsraðað verkefnum betur. Á þeim forsendum er framlögum Íslands til UN Women í Afganistan og Palestínu beint í almenna framkvæmd ársáætlana skrifstofanna tveggja í stað ákveðinna afmarkaðra verkefna. Þá voru veitt framlög til verkefna stofnunarinnar í Zaatari-flóttamannabúðunum í Jórdaníu þar sem konur á flótta frá Sýrlandi fá atvinnutækifæri, menntun og daggæslu fyrir börn sín. Er þetta verkefni einn liður í því að auka samlegðaráhrif fjölþjóðlegrar þróunarsamvinnu og mannúðaraðstoðar. Einnig veitti Ísland framlag til verkefnis UN Women sem snýr að framkvæmd ályktunar öryggisráðs SÞ nr. 1325 um konur, frið og öryggi í Mósambík sem miðar að því að tryggja að hugað sé að jafnrétti og valdeflingu kvenna og stúlkna í ferlum og áætlunum sem stuðla að friði, öryggi og endurreisn þar í landi. Þá fjármagnaði Ísland stöðu sérfræðings á skrifstofu UN Women í Tyrklandi. Árið 2016 var Ísland stærsta gjafaríki UN Women miðað við höfðatölu. Framundan er seta Íslands í stjórn UN Women í eitt ár á tímabilinu 2019-2021.

Fjórði samstarfssamningur utanríkisráðuneytisins og landsnefndar UN Women á Íslandi um framlög gildir tímabilið 2016-2018 en auk kynningar- og fræðslumála veitir landsnefndin almenna ráðgjöf og umsögn vegna málefna á alþjóðavettvangi og fræðir útsenda sérfræðinga á vegum Íslensku friðargæslunnar um jafnréttismál og framkvæmd ályktunar öryggisráðs SÞ nr. 1325.

Sjá einnig:

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn


Þessi síða notar vafrakökur Lesa meira