Tvíhliða þróunarsamvinna

Í gegnum tvíhliða þróunarsamvinnu tekur Ísland beinan þátt í þróunarverkefnum í samstarfslöndum, þar sem áhersla er lögð á að bæta lífskjör í samfélögum og efla getu yfirvalda til að veita íbúum grunnþjónustu. Einnig er sérstök áhersla lögð á valdeflingu kvenna og ungmenna og í vaxandi mæli á loftslags- og umhverfismál.

Stefnumið og áherslur í tvíhliða þróunarsamvinnu

Tvíhliða stefnumið, sem byggja á stefnu Íslands í alþjóðlegri þróunarsamvinnu, setja ramma um sýn, áherslur og framkvæmd í tvíhliða samvinnu og skapa grundvöll fyrir gerð samstarfsáætlana í samstarfslöndum Íslands.

• Stefnumið í tvíhliða þróunarsamvinnu

Lykiláherslusvið Íslands í tvíhliða þróunarsamvinnu:

• Í forgrunni er áhersla á baráttu gegn fátækt og hungri með jafnrétti, mannréttindi og umhverfis- og loftslagsmál, sem sértæk og þverlæg málefni.
• Stuðningur við samstarfsríki og héruð til að uppfylla skyldur sínar um aðgengi að grunnþjónustu á sviði mæðra- og ungbarnaheilsu, menntunar og hreins vatns og hreinlætis.
• Áhersla á efnahagslega valdeflingu kvenna og ungs fólks, með aukna áherslu á og sköpun umhverfisvænna starfa.
• Bláa hagkerfið og fiskimál, heildræn nálgun sem tekur til fiskimála sem og bættra lífsgæða fólks í sjávarbyggðum og uppbyggingu og nýsköpunar við nýtingu auðlinda hafs og vatna.

Tvíhliða þróunarsamvinna skilar árangri

Tvíhliða þróunarsamvinna hefur skilað góðum og sýnilegum árangri, sem hefur verið staðfestur með óháðum úttektum erlendra sérfræðinga og fengið góðar umsagnir í úttektum OECD-DAC, sem er samstarfsvettvangur framlagsríkja.

Malaví

Úganda

Framkvæmd tvíhliða þróunarsamvinnu

Við framkvæmd tvíhliða þróunarsamvinnu er lykiláhersla lögð á eignarhald samstarfsríkja, þátttöku stjórnvalda í undirbúningi og framkvæmd verkefna og samræmingu við þróunaráætlanir viðkomandi ríkja, sem og fagleg vinnubrögð með áherslu á árangur í takti við alþjóðleg viðmið.

Megináherslan í samstarfslöndunum tveimur er á héraðsþróunarverkefni þar sem unnið er í nánu samstarfið við héraðsstjórnir að uppbyggingu innviða og getu til að bæta grunnþjónustu við íbúa. Slík nálgun hefur marga kosti fyrir smáa samstarfsaðila líkt og Ísland, þar sem framlag okkar nær samlegðaráhrifum í gegnum ólíka geira, og fámennt landateymi nær að vinna samstíga með starfsfólki héraðsstjórnar til að hámarka árangur af okkar framlagi. Héraðsnálgun Íslands hefur reynst árangursrík í að efla getu héraðstjórnvalda, skilað sýnilegum árangri og vekur vaxandi áhuga annarra framlagsþjóða.

• Sjá nánari umfjöllun um héraðsþróunarverkefni Íslands á síðu OECD/DAC.

Í tvíhliða samvinnu starfar Ísland einnig náið með stofnunum Sameinuðu þjóðanna. Þannig er leitast við að hámarka samlegð og árangur af starfi Íslands í tvíhliða og marghliða þróunarsamvinnu. Sem dæmi ná nefna samstarfsverkefni með WFP í Malaví um skólamáltíðir, samstarf við UNICEF í Úganda í flóttamannabyggðum, og samstarf við UNFPA í Síerra Leóne við að útrýma fæðingarfistli. Skólar GRÓ-UNESCO koma einnig að framkvæmd verkefna og íslensk félagasamtök styðja við fjölmörg verkefni í samstarfslöndum Íslands.