Hoppa yfir valmynd
Heilbrigðisþjónusta

Forstöðulæknir barnalækninga

Forstöðulæknir barnalækninga

Laus er til umsóknar staða forstöðulæknis barnalækninga við Sjúkrahúsið á Akureyri (SAk) Staðan veitist frá 1. mars 2021 eða eftir samkomulagi. Sjúkrahúsið á Akureyri veitir almenna og sérhæfða heilbrigðisþjónustu, þar sem áhersla er lögð á bráðaþjónustu og helstu sérgreinameðferðir. Það er annað tveggja sérgreinasjúkrahúsa landsins, er kennslusjúkrahús og þekkingarstofnun sem leggur metnað sinn í kennslu og rannsóknir í heilbrigðisvísindum. SAk leggur áherslu á samvinnu við heilbrigðisstofnanir á landsbyggðinni. Barnadeild Sjúkrahússins á Akureyri er eina sérhæfða barnadeildin utan höfuðborgarsvæðisins og sinnir fjölbreyttum sjúklingahópi frá fæðingu til 18 ára aldurs. Á deildinni er legudeild, vökudeild auk dag- og göngudeildar. Deildin sinnir öllum almennum lyflækningum barna og léttari vandamálum nýbura, en auk þess dvelja börn með sjúkdóma á sviði almennra skurðlækninga, bæklunarlækninga, HNE lækninga og kvensjúkdómalækninga á deildinni. Barna- og unglingageðteymi sjúkrahússins heyrir undir barnalækningar. Næsti yfirmaður er Alice Harpa Björgvinsdóttir framkvæmdastjóri lyflækningasviðs.

Helstu verkefni og ábyrgð

Forstöðulæknir barnalækninga hefur yfirumsjón með barnalækningum og er leiðandi og stefnumótandi í greininni á sjúkrahúsinu. Hann fer með verkstjórn yfirlækna og annarra sérfræðinga sem undir hann heyra til að tryggja skjólstæðingum sjúkrahússins bestu mögulegu þjónustu. Forstöðulæknir skipuleggur og hefur eftirlit með vinnu, vaktafyrirkomulagi og mönnun innan einingarinnar í samræmi við markmið um rekstur, fjárhagsramma og hagkvæma nýtingu mannafla. Hann starfar einnig sem sérfræðingur á sviðinu. Starfinu fylgir vaktskylda, þátttaka í kennslu heilbrigðisstétta, þjálfun aðstoðar- og deildarlækna auk tækifæra til rannsóknarvinnu. Starfið felur í sér þjónustu við sjúklinga á barnadeild, göngudeild, bráðamóttöku og fæðingadeild.

Hæfnikröfur

Umsækjendur skulu hafa íslenskt lækningaleyfi og fullgild sérfræðiréttindi í barnalækningum. Auk faglegrar reynslu, fræðilegrar þekkingar og reynslu af stjórnun og kennslu er lögð áhersla á leiðtogahæfileika og hæfileika á sviði samskipta, samvinnu og sjálfstæðra vinnubragða.

Frekari upplýsingar um starfið

Laun samkvæmt gildandi kjarasamningi sem fjármála- og efnahagsráðherra og Læknafélag Íslands hafa gert.
Umsóknum skal skilað rafrænt á vef sjúkrahússins www.sak.is Umsóknum skulu fylgja ítarlegar upplýsingar um nám, fyrri störf, reynslu af stjórnunarstörfum ásamt upplýsingum um fræðilegar rannsóknir og ritstörf, auk kennslustarfa eftir því sem við á. Stöðunefnd lækna, sbr. 35. gr. laga um heilbrigðisþjónustu nr. 40/2007, metur hæfni umsækjenda. Viðtöl verða höfð við umsækjendur og byggist ákvörðun um ráðningu á þeim, innsendum gögnum og umsögn stöðunefndar. ATH. Fylla þarf út lágmarksupplýsingar á almenna umsókn og setja viðhengi, en ýtarlegri upplýsingar í umsókn fyrir læknisstöðu, sjá slóð hér fyrir neðan. Öllum umsóknum verður svarað þegar ákvörðun um ráðningu hefur verið tekin. Við ráðningar í störf er tekið mið af jafnréttisstefnu sjúkrahússins. Sjúkrahúsið á Akureyri er reyklaus vinnustaður. Gildi Sjúkrahússins á Akureyri eru: ÖRYGGI SAMVINNA FRAMSÆKNI Sjúkrahúsið á Akureyri veitir alþjóðlega DNV-GL vottaða heilbrigðisþjónustu með ISO vottuðu gæðastjórnunarkerfi. Áhersla er á virka þátttöku allra starfsmanna til að uppfylla þær gæðakröfur sem gerðar eru í alþjóðlegum staðli sem sjúkrahúsið er vottað eftir.

Starfshlutfall er 100%

Umsóknarfrestur er til og með 01.02.2021

Nánari upplýsingar veitir

Andrea Elísabet Andrésdóttir - [email protected] - 4630100
Alice Harpa Björgvinsdóttir - [email protected] - 4630100

Umsókn um læknisstöðu - umsóknareyðublað Embættis landlæknis

Smelltu hér til að sækja um starfið

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira