Hoppa yfir valmynd
Kennsla og rannsóknirHöfuðborgarsvæðiðRaunvísindastofnun Háskólans

Sérfræðingur í Kvarterjarðfræði með áherslu á loftslagsbreytingar á norðlægum slóðum

Sérfræðingur í Kvarterjarðfræði með áherslu á loftslagsbreytingar á norðlægum slóðum

Laust er til umsóknar starf sérfræðings á sviði Kvarterjarðfræði við Jarðvísindastofnun Háskólans.

Helstu verkefni og ábyrgð

Sérfræðingnum er ætlað að stunda hágæða rannsóknir á sviði Kvarterjarðfræði með áherslu á þróun loftslags- og umhverfisbreytinga á norðurslóðum. Rannsóknir í Kvarterjarðfræði, jöklajarðfræði og fornloftslagsfræði hafa verið órjúfanlegur hluti af jarðfræðirannsóknum við Háskóla Íslands í meira en 50 ár og er stefnt að því að viðhalda og þróa enn öflugri rannsóknir á því sviði í framtíðinni. Ætlast er til að viðkomandi starfsmaður taki virkan þátt í alþjóðlegum verkefnum. Stofnunin leitar að aðila sem er áhugasamur um að efla rannsóknarinnviði hennar á sviði auglýsts starfs.

Gert er ráð fyrir að sérfræðingurinn komi að leiðbeiningu framhaldsnema og mögulega annarri kennslu við Jarðvísindadeild Verkfræði- og náttúruvísindasviðs.  Umfang kennslu yrði samkvæmt samkomulagi sérfræðingsins við stjórn Jarðvísindastofnunar í samræmi við 10. gr. reglna Raunvísindastofnunar Háskólans nr. 685/2011 og ákvörðun Jarðvísindadeildar.

Hæfniskröfur

  • Doktorspróf í jarðfræði
  • Bakgrunnur í rannsóknum á sviði loftslagsbreytinga Kvarter tímabils á norðlægum slóðum
  • Æskilegt er að umsækjandi hafi sérþekkingu og reynslu af því að beita nýjustu aðferðum á sviði Kvarterjarðfræði og í loftslagsfræðum
  • Reynsla af að leiða rannsóknaverkefni og afla rannsóknastyrkja
  • Reynsla af rannsóknarsamstarfi, vinnu í þverfaglegum teymum og hæfni til að mynda rannsóknartengsl
  • Góð samstarfshæfni og lipurð í mannlegum samskiptum

 

Frekari upplýsingar um starfið

Laun samkvæmt gildandi kjarasamningi sem fjármála- og efnahagsráðherra og Félag háskólakennara hafa gert.

Við ráðningu verður horft til þess að umsækjendur falli sem best að aðstæðum og þörfum Jarðvísindastofnunar.

Gert er ráð fyrir að starfið hefjist 1. janúar 2023.

Nánari upplýsingar um starfið veita Anna Jóna Baldursdóttir rekstrarstjóri Jarðvísindastofnunar Háskólans ([email protected]) og Ingibjörg Óðinsdóttir, mannauðsstjóri  Verkfræði- og náttúruvísindasviðs HÍ ([email protected]).

Umsækjendur skulu láta eftirfarandi gögn fylgja umsókn sinni:

  1. Kynningarbréf þar sem m.a. kemur fram hvernig umsækjandi uppfyllir hæfniskröfur.
  2. Prófskírteini eða eftir atvikum vottorð um námsferil.
  3. Akademíska ferilskrá (Curriculum Vitae).
  4. Ritaskrá.
  5. Skýrslu um vísindastörf og önnur störf sem þeir hafa unnið.
  6. Greinargerð um rannsóknaráform ef til ráðningar kemur.
  7. Upplýsingar um þrjá mögulega umsagnaraðila sem hafa má samband við.

Í umsókn skal koma fram hver ritverka sinna, allt að átta talsins, umsækjandi telur veigamest með tilliti til þess starfs sem um ræðir. Umsækjandi sendir eingöngu þessi ritverk sín með umsókn eða vísar til þess hvar þau eru aðgengileg á rafrænu formi. Þegar fleiri en einn höfundur stendur að innsendu ritverki skulu umsækjendur gera grein fyrir framlagi sínu til verksins. Umsóknargögnum sem ekki er hægt að skila rafrænt skal skila í tvíriti til vísinda- og nýsköpunarsviðs Háskóla Íslands, Sæmundargötu 2, 102 Reykjavík.

Ráðið verður í starfið til fimm ára fyrst í stað, með möguleika á ótímabundinni ráðningu að þeim tíma liðnum sbr. 3. mgr. 31. gr. reglna fyrir Háskóla Íslands nr. 569/2009.

Um meðferð umsókna, mat á hæfi umsækjenda og ráðningu í starfið er farið eftir ákvæðum laga nr. 85/2008 um opinbera háskóla og reglna um Háskóla Íslands nr. 569/2009.

Öllum umsóknum verður svarað og umsækjendum tilkynnt um ráðstöfun starfsins þegar ákvörðun hefur verið tekin. Umsóknir geta gilt í sex mánuði frá lokum umsóknarfrests. 

Við ráðningu í störf í Háskóla Íslands er tekið mið af jafnréttisáætlun skólans

Vakin er athygli á málstefnu Háskóla Íslands.

Jarðvísindastofnun er faglega og fjárhagslega sjálfstæð stofnun innan Raunvísindastofnunar Háskólans. Stofnunin er vettvangur jarðvísindarannsókna  sérfræðinga, kennara og framhaldsnemenda við Háskóla Íslands. Stofnunin hefur sterk alþjóðleg tengsl þar sem  mörg rannsóknaverkefni eru unnin í víðtæku samstarfi vísindamanna hérlendis og erlendis.  Nánari upplýsingar má finna á vefsíðu stofnunarinnar: http://jardvis.hi.is/.

Starfshlutfall er 100%

Umsóknarfrestur er til og með 02.08.2022

Nánari upplýsingar veitir

Anna Jóna Baldursdóttir, Rekstrarstjóri Jarðvísindastofnunar Háskólans - [email protected]

Smelltu hér til að sækja um starfið

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira