Handbók byggingariðnaðarins á vefnum

Handbók byggingariðnaðarins (habygg.is)

Rafrænn gagnabanki , www.habygg.is var opnaður á Rannsóknarstofnun byggingariðnaðarins þ. 26. febrúar 2002. Gagnabankinn er " Handbók byggingariðnaðarins" en þar er að finna upplýsingar sem spanna flest svið byggingageirans, upplýsingar um útgáfu Rb. - rannsóknaskýrslur, sérrit , Rb. - tækniblöð og margt fleira. Markmiðið með Handbók byggingariðnaðarins er að koma á framfæri ráðgjöf og hagnýtum upplýsingum á rafrænu formi til byggingariðnaðarins, skólakerfisins og almennra húseigenda.


Handbók byggingariðnaðarins er hluti verkefnis Iðnaðarráðuneytisins "Opnir gagnagrunnar í þágu atvinnulífs, almennings og skóla" í anda markmiða ríkisstjórnarinnar um upplýsingasamfélagið. Markmið verkefnisins er að stuðla að því að upplýsinga- og fjarskiptatækni verði virkjuð til að bæta samkeppnisstöðu íslensks atvinnulífs, auka framleiðni, örva atvinnu og fjölga möguleikum til útfluttnings á íslensku hugviti.

Hjá Rannsóknastofnun byggingariðnaðarins eru fyrir hendi miklar upplýsingar og sérfræðiþekking á öllum sviðum mannvirkjagerðar, sem með "Handbók byggingariðnaðarins" (habygg.is) eru gerðar aðgengilegar fyrir atvinnulíf, almenning og skóla. Rannsóknaniðurstöður, athuganir og efni unnið úr ýmsum gögnum stofnuninnar hafa verið settar í gagnasafn sem mun nýtast jafnt sérfræðingum, fagfólki, iðnaðarmönnum, nemendum á byggingarsviði sem og almennum húseigendum. Með habygg.is er ætlunin að gera áður birtar upplýsingar aðgengilegri, birta nýtt efni sem hentar rafrænni útgáfu og koma á fót beinni ráðgjöf við valda markhópa.

Hér er um að ræða viðamikið verkefni, þannig að gera má ráð fyrir því að verkinu verði ekki endanlega lokið fyrr en árið 2003.