Hoppa yfir valmynd

Ráðherranefndir

Átta ráðherranefndir eru starfandi. Um starfshætti ráðherranefnda gilda reglur nr. 166/2013.

Ráðherranefnd um ríkisfjármál

Hlutverk ráðherranefndar um ríkisfjármál er að skipuleggja vinnubrögð á sviði ríkisfjármála á vettvangi ríkisstjórnarinnar og vinnubrögð gagnvart ráðuneytum og Alþingi, svo sem um stefnumótun í opinberum fjármálum, undirbúningi fjárlagagerðar, eftirlit með framkvæmd fjárlaga og langtímaáætlun í ríkisfjármálum.

Forsætisráðherra, fjármála- og efnahagsráðherra og innviðaráðherra eiga fast sæti í nefndinni.

Ráðherranefnd um efnahagsmál og endurskipulagningu fjármálakerfisins

Hlutverk ráðherranefndar um efnahagsmál og endurskipulagningu fjármálakerfisins er að samræma stefnu ríkisstjórnarinnar í efnahagsmálum og hafa eftirlit með framkvæmd efnahagsstefnunnar á einstökum sviðum. Meðal þeirra verkefna sem nefndin fjallar um er framtíðarskipulag peningamála og samræming í fjármálum hins opinbera til skemmri og lengri tíma. Nefndin er auk þess stefnumótandi og í forystu varðandi samskipti við aðila vinnumarkaðarins, uppbyggingu fjármálakerfisins og stöðu Íslands á alþjóðavettvangi með tilliti til efnahagsmála. Þá er henni jafnframt ætlað að vera vettvangur samráðs og samræmingar við endurskoðun fjármálakerfisins í samræmi við þá áherslu í sáttmála ríkisstjórnar að breið sátt náist um endurskipulagningu fjármálakerfisins á Íslandi.

Forsætisráðherra, fjármála- og efnahagsráðherra og menningar-og viðskiptaráðherra eiga fast sæti í nefndinni.

Ráðherranefnd um samræmingu mála er varða fleiri en eitt ráðuneyti

Hlutverk ráðherranefndar um samræmingu mála er að samhæfa stefnu og aðgerðir í málum þar sem málefnasvið og ábyrgð ráðherra skarast og tryggja vandaðan undirbúning mála og upplýsingaflæði á milli ráðherra. Nefndinni er auk þess ætlað að fylgja eftir innleiðingu verkefna í stjórnarsáttmála með markvissum hætti.

Forsætisráðherra á fast sæti í nefndinni en aðrir ráðherrar munu sitja fundina í samræmi efni mála sem til umfjöllunar eru hverju sinni.

Ráðherranefnd um jafnréttismál

Hlutverk ráðherranefndar um jafnréttismál er að samhæfa störf ráðherra og ríkisstjórnar á sviði jafnréttismála. Það á t.d. við um baráttu gegn kynbundnu ofbeldi og ofbeldi í nánum samböndum, baráttu gegn kynbundnum launamun, að sambærileg störf séu metin með sambærilegum hætti og um málefni hinsegin fólks.

Forsætisráðherra, félags- og vinnumarkaðsráðherra, dómsmálaráðherra, heilbrigðisráðherra, utanríkisráðherra og mennta- og barnamálaráðherra eiga fast sæti í nefndinni. Aðrir ráðherrar sitja fundi ráðherranefnda eftir þörfum, samkvæmt ákvörðun forsætisráðherra sem stýrir fundum nefndanna í samræmi við reglur um starfshætti ráðherranefnda nr. 166/2013. 

Ráðherranefnd um loftslagsmál

Hlutverk ráðherranefndar um loftslagsmál er að efla samráð og samhæfingu meðal þeirra ráðuneyta sem vinna að framgangi loftslagsmála innan Stjórnarráðsins. Nefndinni er einnig ætlað að vera vettvangur fyrir pólitíska stefnumótun og umræður um aðgerðir á sviði loftslagsmála. Nefndinni er jafnframt ætlað að koma að uppfærslu og framkvæmd aðgerðaáætlunar stjórnvalda í loftslagsmálum, fjalla um umræður á alþjóðavettvangi um nýjar skuldbindingar og stefnu Íslands varðandi kolefnishlutleysi.

Forsætisráðherra, umhverfis-, orku- og loftslagsráðherra, háskóla-, iðnaðar og nýsköpunarráðherra, fjármála- og efnahagsráðherra, innviðaráðherra, matvælaráðherra og utanríkisráðherra eiga fast sæti í nefndinni.

Ráðherranefnd um málefni innflytjenda og flóttafólks

Hlutverk ráðherranefndar um málefni innflytjenda og flóttafólks er að vinna markvisst að áherslum stjórnarflokkanna í málaflokknum. Þar er m.a. lögð áhersla á að mótuð verði skýr og heildstæð stefna í málefnum útlendinga, rík áhersla lögð á stuðning til aðlögunar við börn af erlendum uppruna og fjölskyldur þeirra og að lög um útlendinga og lög um atvinnuréttindi útlendinga verði endurskoðuð. Málefni innflytjenda varða málefnasvið margra ráðuneyta auk sveitarfélaga og ýmissa stofnana. Því er nauðsynlegt að tryggja öfluga samvinnu og samhæfingu í málaflokknum og er skipun ráðherranefndar liður í því. Um er að ræða tímabundna ráðherranefnd.

Forsætisráðherra, dómsmálaráðherra, félags- og vinnumarkaðsráðherra og mennta- og barnamálaráðherra eiga fast sæti í nefndinni. Náin samvinna verður einnig við háskóla-, iðnaðar- og nýsköpunarráðherra og aðra ráðherra eftir atvikum á starfstímanum.

Ráðherranefnd um íslenska tungu

Hlutverk ráðherranefndar um íslenska tungu er að efla samráð og samstarf milli ráðuneyta um málefni íslenskrar tungu og tryggja samhæfingu þar sem málefni skarast. Þá mun ráðherranefndin vinna markvisst að stefnumótun stjórnvalda og aðgerða í þágu tungumálsins.

Forsætisráðherra, menningar- og viðskiptaráðherra, mennta- og barnamálaráðherra, félags- og vinnumarkaðsráðherra og háskóla-, iðnaðar- og nýsköpunarráðherra eiga fast sæti í ráðherranefndinni. Munu ráðuneyti þeirra hafa umsjón með skilgreindum áherslum sem verða útfærð í aðgerðaáætlun um íslenska tungu.

Ráðherranefnd um vísindi og nýsköpun

Hlutverk ráðherranefndar um vísindi og nýsköpun er að samræma stefnu stjórnvalda á sviði tækniþróunar, vísinda og nýsköpunar. Ráðherranefndin heldur að jafnaði tvo fundi árlega með Vísinda- og nýsköpunarráði, sem starfar sjálfstætt og fjallar um stöðu vísinda, tækniþróunar og nýsköpunar á Íslandi með tilvísun til alþjóðlegrar þróunar í stefnumótun á málefnasviðinu, auk þess að veita ráðherranefnd um vísindi og nýsköpun og ráðherra sem fer með málefni vísinda og nýsköpunar ráðgjöf. 

Forsætisráðherra, fjármála- og efnahagsráðherra, háskóla-, iðnaðar- og nýsköpunarráðherra og mennta- og barnamálaráðherra eiga fast sæti í ráðherranefndinni en þar sem málefni vísinda og nýsköpunar snerta fleiri ráðuneyti sitja heilbrigðisráðherra, matvælaráðherra og umhverfis-, orku- og loftlagsráðherra samkvæmt ákvörðun forsætisráðherra einnig í nefndinni.  

Var efnið hjálplegt?
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Yfirlit

Hafa samband

Ábending / fyrirspurn
Ruslvörn
Vinsamlegast svaraðu í tölustöfum