Almannatryggingar og lífeyrir

Íslenska lífeyristryggingakerfið byggist á þremur meginstoðum sem eru almannatryggingakerfi, lífeyrissjóðakerfi og viðbótarlífeyrissparnaður. 

Almannatryggingar eru opinbert lífeyriskerfi með skylduaðild allra landsmanna og eru samtrygging, tekjujöfnun og félagslegt öryggi lífeyrisþega meginmarkmið þeirra. Til almannatrygginga teljast lífeyristryggingar, sjúkratryggingar og slysatryggingar. 

Lífeyrissjóðirnir byggjast á skylduaðild allra sem eru starfandi á aldrinum sextán ára til sjötugs og hafa það markmið að standa undir ellilífeyri og samtryggingu. 

Viðbótarlífeyrissparnaður er valkvæð sparnaðarleið fyrir efri ár.

Verkefni á sviði almannatrygginga og lífeyris heyra meðal annars undir eftirfarandi málefnasvið í gildandi fjármálaáætlun:

• Örorka og málefni fatlaðs fólks 
• Málefni aldraðra 
• Fjármagnskostnaður, ábyrgðir og lífeyrisskuldbindingar