Hoppa yfir valmynd

Um vefinn

DRÖG: Vefstefna Stjórnarráðs Íslands

Vefur Stjórnarráðs Íslands, stjornarradid.is, er sameiginlegur ytri vefur ráðuneytanna. Hann veitir þjónustu og upplýsingar sem stjórnvöld búa yfir og koma á framfæri.

Markmiðið með sameiginlegum vef ráðuneytanna er að fólk geti á einum stað nálgast upplýsingar, þjónustu og gögn frá Stjórnarráðinu með auðveldum hætti. 

Efni vefsins er faglega unnið. Veittar eru áreiðanlegar upplýsingar um málefni ráðuneyta og ríkisstjórnar, og leitast við að setja þær fram á einföldu og skýru máli. Nýtt efni er birt þegar það á við og eldra efni uppfært eftir þörfum. 

Vefurinn styður við opna og gagnsæja stjórnsýslu. 

Notendur og efni vefsins

Notendur vefs Stjórnaráðsins eru fjölbreyttur hópur. Við skrif  og framsetningu efnis er leitast við að taka tillit til ólíkra þarfa. Í flestum tilfellum er efni sett fram með almenna notendur í huga, texti stuttur og skýr svo hann gagnist sem flestum. Ef um mjög sértækt efni eða langan texta er að ræða er í upphafi birt stutt samantekt sem skýrir innihaldið. Grunnupplýsingar og efni sem er mest sótt er í efstu lögum vefsins en ítarlegra efni þar undir. 

Ritstjórn og ábyrgð

Efni á vef Stjórnarráðsins er birt á ábyrgð ráðuneyta sem skráð eru fyrir efninu. 

Hvert ráðuneyti sér um ritstjórn á því efni sem það birtir á vefnum og heyrir undir verksvið þess samkvæmt forsetaúrskurði um skiptingu málefna milli ráðuneyta. Ritstjórn á forsíðu vefsins er í höndum forsætisráðuneytisins í samstarfi við önnur ráðuneyti svo og efni sem er almennt um ríkisstjórn og Stjórnarráðið. 

Framtíðarsýn

Ráðuneytin hafa um árabil rekið fjölda vefja. Með sameiningu þeirra er leitast við að bæta þjónustu við notendur með sem hagkvæmustum hætti. Á sameinuðum vef geta notendur á einum stað fundið efni og þjónustu óháð því hvaða ráðuneyti veitir hana. Skipulag efnis og leitarvirkni á vefnum er miðuð að þörfum notenda. 

Við uppbyggingu sameiginlegs vefs, stjornarradid.is, er byrjað á sameina aðalvefi ráðuneytanna og í kjölfarið munu flestir aðrir vefir sem eru í umsjón ráðuneytanna verða hluti hans. Einstakir vefir verða þó ekki hluti af nýjum vef. Það sem kann að hindra flutning þeirra eru flókin tæknilegra atriði, mikill kostnaður og lagalegar hindranir. Ekki verða settir upp vefir vegna tímabundinna verkefna, slíkt efni verður þess í stað hluti af Stjórnarráðsvefnum.

Vefur Stjórnarráðs Íslands á að vera til fyrirmyndar hvað varðar innihald, nytsemi, aðgengi, þjónustu og öryggi. Þessir þættir eru mældir í könnun á opinberjum vefjum  og er markmiðið að vefur Stjórnarráðsins sé með að lágmarki 95 stig af 100. Sérstaklega skal gætt að aðgengismálum og farið eftir stefnu stjórnvalda í þeim efnum .

Vefurinn tekur mið af tækniþróun og þeim möguleikum sem hún býður upp á. Dæmi um það er aðlögun útlits að mismunandi skjástærðum og ritstýrð leit. Stöðlum og almennum viðmiðum í vefmálum er fylgt. 


Nánari upplýsingar er að finna í eftirfarandi gögnum:

Síðast uppfært: 21.11.2016
Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn


Þessi síða notar vafrakökur Lesa meira